თბილისის მერმა, კახა კალაძემ კომენდანტის საათის დროს ქალაქში ელექტროსკუტერით სატესტოდ გაისეირნა. მისი თქმით, მსგავსი ტიპის ტრანსპორტი ყველა ევროპულ ქალაქშია.

"რაც თბილისში არის სიახლე, რაც ძალიან მნიშვნელოვანია. ძალიან მიხარია როგორც ქალაქის მერს, როცა კარგი რაღაცები კეთდება, სიახლეები შემოდის, ბავშვივით მიხარია. დარწმუნებული ვარ, ძალიან ბევრ ადამიანს მოსწონს და სიამოვნებს, როდესაც ქალაქში სიახლეები შემოდის", — აღნიშნა კალაძემ.

მისივე თქმით, ცხოვრება გრძელდება და ქვეყანა აუცილებლად გამოვა არსებული რთული ვითარებიდან.

საქართველოში დღეიდან, ელექტროსკუტერების გაზიარების საპილოტე სერვისი ამოქმედდა. თბილისის ცნობით, ეკომეგობრული ტრანსპორტით სარგებლობისთვის შექმნილია სპეციალური აპლიკაცია (BIRD) და ვებგვერდი (www.scroll.eco), სადაც სკუტერის გამოყენების წესები და გადაადგილებისთვის აუცილებელი დეტალებია აღწერილი.

ელექტროსკუტერით პირველი მგზავრობისას ათი წუთი უფასოა. მომხმარებელი მის გააქტიურებას სპეციალური პრომო კოდის საშუალებით შეძლებს. მგზავრობის დაწყების ღირებულება 1 ლარია, ხოლო ყოველი მომდევნო წუთი 35 თეთრი ღირს.

საპილოტე პროგრამის ფარგლებში ჯერ მხოლოდ 10 ერთეული სკუტერია, პროგრამით კი 1 000 ერთეულია გათვალისწინებული.