კორუფციისთვის მსჯავრდებულმა ზუგდიდის ყოფილმა მერმა და მიი მოადგილემ სასჯალეღსრულების დაწესებულება დატოვეს. როგორც On.ge-ს პენიტენციურ სამსახურში უთხრეს, ლაშა გოგიას და გია გულორდავას დარჩენილი სასჯელი შინაპატიმრობით შეეცვალათ.

"2020 წლის აპრილში შესაბამისი ადგილობრივი საბჭოების გადაწყვეტილებით, 50 მსჯავრდებულს, მათ შორის მსჯავრდებულებს ლ.გ.-ს და გ.გ.-ს (ვინც მოიხადა სისხლის სამართლის კოდექსის 73-ე მუხლით დადგენილი ვადა) მოსახდელად დარჩენილი სასჯელი შეეცვალათ უფრო მსუბუქი სასჯელით — შინაპატიმრობით", — ამბობენ უწყებაში.

ზუგდიდის ყოფილი მერი და მისი მოადგილე 2018 წლის 1 ნოემბერს დააკავეს. გამოძიება მათ ჯგუფურად, განსაკუთრებით დიდი ოდენობით ქრთამის აღებას ედავება. 2019 წლის 25 ივნისს გოგიასა და გულორდავას ორი წლით თავისუფლების აღკვეთა და ოთხი წლით პირობითი მსჯავრი მიუსაჯეს.