დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ბოჭორიშვილის კლინიკაში ადასტურებენ, რომ სასულიერო პირს კორონავირუსი დაუდასტურდა. კლინიკის სამეთვალყურეო საბჭოს თავმჯდომარე მაია სოლოღაშვილი ამბობს, რომ სასულიერო პირი გუშინ, 13 აპრილს შეიყვანეს. დაინფიცირების წყარო კი ამ დროისთვის უცნობია.

"[სასულიერო პირის] ოჯახის სამი წევრია მოთავსებული, მაგრამ რომელს რომლისგან გადაეცა, ამ ეტაპზე შეუძლებელია საუბარი", — აღნიშნა სოლოღაშვილმა.

სასულიერო პირთან დაკავშირებით On.ge ამ დრომდე ცდილობს დაუკავშირდეს საპატრიარქოს პრესსამსახურს და გაარკვიოს, ჰქონდა თუ არა ინფიცირებულ მღვდელს მრევლთან ურთიერთობა და ატარებდა თუ არა ის ღვთისმსახურებას.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

12 აპრილს ცნობილი გახდა, რომ მართლმადიდებელ ეკლესიებში სააღდგომო ღვთისმსახურებას კომენდანტის საათის დროს ჩაატარებენ.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

ბოლო მონაცემებით, საქართველოში კორონავირუსით ინფიცირებულია 296 ადამიანი, მათგან გამოჯანმრთელებულია 68, ხოლო გარდაცვლილი — 3. კარანტინის რეჟიმში 4 834 ადამიანი იმყოფება, სტაციონარში მეთვალყურეობის ქვეშ კი 434.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: