დღეს ენმ-ს პოლიტსაბჭოს სხდომაზე პარტიის სამომავლო გეგმებსა და გიგი უგულავას მიერ გავრცელებულ წერილთან დაკავშირებით იმსჯელებენ, რომელშიც თბილისის ყოფილი მერი წერს, რომ პარტიის თავმჯდომარის პოსტზე მიხეილ სააკაშვილის ნაცვლად სხვა პირის არჩევაზე მსჯელობა აუცილებელია. ნაციონალურ მოძრაობაში პოლიტსაბჭოს სხდომა 19:30 საათზეა ჩანიშნული.

ენმ-ს ლიდერები გიგი უგულავას წერილს ეხმაურებიან და მათი ნაწილი აცხადებს, რომ არსებული ვითარებიდან გამომდინარე, როდესაც სააკაშვილს საქართველოს მოქალაქეობა არ აქვს და ის ვერ მონაწილეობს პოლიტიკურ პროცესებში, დღის წესრიგში შესაძლოა დადგეს პარტიის ახალი თავმჯდომარის არჩევის საკითხი. თუმცა, ენმ-ს წევრთა ნაწილი ამ მოსაზრებას არ იზიარებს.

როგორც პარტიის ერთ-ერთმა წევრმა, ოთო კახიძემ განაცხადა, პარტიამ უნდა მიიღოს გადაწყვეტილებები და ამ გადაწყვეტილებების მიღების პროცესს აფერხებს ის, რომ პარტიის ლიდერთა ნაწილი არის საზღვარგარეთ და მეორე ნაწილი არის ციხეში:

"შესაბამისად, პარტიამ ეს მკვდარი წერტილი უნდა დაძლიოს და აირჩიოს ახალი ლიდერები. მიხეილ სააკაშვილი იმის გამო, რომ მიმდინარეობს მასზე სისხლის სამართლის დევნა, არ იმყოფება საქართველში, გაცემულია დაპატიმრების ორდერი და არის უკრაინის მოქალაქე. ის აიძულეს, რომ ჩამოეშორებინათ პოლიტიკური პროცესისთვის, ამიტომ პარტიამ კი არ უნდა გადაირჩიოს მიხეილ სააკაშვილი, არამედ უნდა აირჩიოს თავმჯდომარე, რომელიც მას ამ მომენტისთვის არ ჰყავს".

ზურაბ ჭიაბერაშვილი კი ამბობს, მიხეილ სააკაშვილის დევნილობაში ყოფნა პოლიტიკური ნიშნით არის განპირობებული და აღნიშნული ბიძინა ივანიშვილის პირადი სურვილია:

"ამიტომ მიხეილ სააკაშვილი იმის გამო, რომ მას ჩამოართვა მოქალაქეობა ივანიშვილის რეჟიმმა, საქართველოს კანონმდებლობით ვერც იქნება საქართველოში პოლიტიკური პარტიის თავჯდომარე და ის ფორმალურად არც არის ახლა პარტიის თავჯდომარე".

განსხვავებული პოზიცია აქვს პარტიის კიდევ ერთ წევრს, აკაკი მინაშვილს განსხვავებული პოზიცია აქვს და თავისი მოსაზრებას Facebook-ის მეშვეობით ავრცელებს:

"არ ვეთანხმები მოსაზრებას, რომ ნაციონალური მოძრაობის პარტიის თამჯდომარის პოზიციაზე, რომელიც ჩვენ მიხეილ სააკაშვილის როლის და ჩართულობის ხაზგასმის მიზნით სიმბოლურად ღიად დავტოვეთ (სხვაგვარად უბრალოდ შეუძლებელი იყო, ვინაიდან მას მოქალაქეობა უკანონოდ ჩამოართვეს), უნდა იქნას არჩეულ ენმ-ის სხვა ლიდერი".