დაავადებათა კონტროლის ცენტრის ხელმძღვანელი, ამირან გამყრელიძე მოუწოდობეს საქართველოში დაბრუნებულ მოქალაქეებს, რომ საზღვარზე სიმპტომებისა და ჯანმრთელობის შესახებ ზუსტი ინფორმაცია მიაწოდონ. მისივე თქმით, ეს მნიშვნელოვანია, რათა შესაძლო ინფექციის გავრცელებას ხელი შეუშალონ.

"ვინც ბრუნდებიან განსაკუთრებით იტალიიდან, ესენი ძირითადად არიან საქართველოს მოქალაქეები. მათზე ვრცელდება ორი რეჟიმი, იზოლაციისა და კარანტინის რეჟიმი. ვისაც აქვს, სიმპტომები საზღვარზე ისინი გადადიან კარანტინში, მაგრამ არის შემთხვევები, როდესაც იციან, რომ აქვთ გარკვეული სიმპტომები, კერძოდ ტემპერატურა, იღებენ სპეციალურად სიცხის დამწევს, რომ ეს არ დაფიქსირდეს საზღვარზე და ამით სიმპტომი დროებით იმალება", — აღნიშნა გამყრელიძე.

ამჯერად გამყრელიძე მოუწოდებს მოქალაქეებს, რომ გადაუდებელი აუცილებლობის გარდა, ზოგადად, საზღვარგარეთ მოგზაურობისგან თავი აირიდონ.

ამჟამინდელი ინფორმაციით, გამოკვლეული 37 პაციენტიდან კორონავირუსის ახალი შემთხვევა არც ერთს არ დაუდასტურდა. ამირან გამყრელიძე ამბობს, რომ ლუგარის ლაბორატორიაში კიდევ 24 ნიმუშია გაგზავნილი, რომელთა პასუხიც დღის განმავლობაში იქნება.

საქართველოში ამჟამად კორონავირუსის სამი შემთხვევაა დაფიქსირებული. კორონავირუსით ინფიცირების პირველი შემთხვევა საქართველოში 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე კი — 29 თებერვალს.

ვირუსის პირველი შემთხვევა დაუდგინდა საქართველოს მოქალაქეს, რომელიც აზერბაიჯანის გავლით ირანიდან შემოვიდა ქვეყანაში. მეორე კი - პირს, რომელმაც ჩრდილოეთ იტალიაში იმოგზაურა. ჯანდაცვის მინისტრის თქმით, პირველი ინფიცირებული საბაჟოდან პირდაპირ ინფექციურ საავადმყოფოში გადაიყვანეს, მეორე ინფიცირებულზე კი ახლა ადგენენ, ვისთან ჰქონდა კონტაქტი. მესამე დაინფიცირებულიც საქართველოს მოქალაქეა, რომელიც ირანიდან შემოვიდა ქვეყანაში. პაციენტს კონტაქტი ჰქონდა პირველ დაინფიცირებულ პაციენტთან, რომელიც ასევე აზერბაიჯანის გავლით, ირანიდან შემოვიდა საქართველოში.