2020 წლის ბოლოს საქართველოს ამერიკული პოპ-როკ ბენდი OneRepublic ეწევევა, რომელიც 10 ოქტომბერს Black Sea Arena-ს სეზონს დახურავს.

კონცერტზე დასასწრები ბილეთების შეძენა 6 მარტს, 13:00 საათიდან ვებ გვერდზე www.bsa.ge დაიწყება.

OneRepublic-მა 2020 წელს ახალი ალბომი Human და ტურნე დააანონსა, რომლის ფარგლებშიც ბლექ სი არენას კონცერტიც მოხვდა. სეზონის დახურვის ღონისძიებაზე OneRepublic როგორც ძველ ჰიტებს, ასევე ახალ კომპოზიციებს შეასრულებს.

მუსიკალური ჯგუფი 2002 წელს შეიქმნა, თუმცა პირველ მნიშვნელოვან წარმატებას 5 წლის შემდეგ, კომპოზიციით Apologize მიაღწია. ამ კომპოზიციის წარმატება გაიზიარა სადებიუტო ალბომმაც Dreaming Out Loud, რომელშიც ბენდის სხვა პოპულარული ჰიტებიც Say (All I Need) და Stop and Stare გვხვდება.

პარალელურად, ჯგუფის ფრონტმენი რაიან ტედერი სხვადასხვა წარმატებული პროექტის მონაწილე გახდა: მის მიერ დაწერილი სიმღერები ბიონსეს, ადელის, Maroon 5-სა და ლეონა ლუისის დისკოგრაფიაში მოხვდა. ამის პარალელურად, OneRepublic-ის წარმატებული სვლა არ შენელებულა, პირიქით, 2009 წელს ბენდმა მეორე ალბომი Waking Up გამოაქვეყნა, რომელიც კომპოზიციებს All the Right Moves, Secrets და Good Life შეიცავს.

ამერიკული ჯგუფისთვის განსაკუთრებით წარმატებული აღმოჩნდა 2013 წლის სტუდიური კრებული Native, რაც პირველ რიგში If I Lose Myself და Counting Stars-ის დამსახურებაა. 3 მილიარდი მოსმენით და ჩარტებში დამყარებული რეკორდების წყალობით Counting Stars დეკადის ერთ-ერთი ყველაზე წარმატებული ჰიტი გახდა, ბენდმა კი ახალი თაობის საყვარელი პროექტის ნიშა დაიკავა.

OneRepublic-ის გარდა, 2020 წლის სეზონზე ბლექ სი არენა არაერთ მსოფლიო ვარსკვლავს უმასპინძლებს, რომელთა ჩამონათვალს შეკვეთილში მდებარე საკონცერტო არენის ოფიციალურ საიტსა და ფეისბუქ გვერდზე ეტაპობრივად გაეცნობით. მათ შორის იქნება Nile Rodgers & Chic-იც.