უმრავლესობის ყოფილმა წევრმა და დამოუკიდებელმა დეპუტატმა, თამარ ხულორდავამ, ყოფილ თანაგუნდელს, რევაზ არველაძეს უთხრა, რომ საქართველოში ბავშვები შიმშილობენ და მისთვის ეს "უცნაური ამბავი" არ უნდა იყოს. მისი თქმით, ქვეყანაში, სადაც სიღარიბე დაუძლეველი პრობლემაა, გასაკვირი არაა, რომ ეს პრობლემა არსებობდეს.

"ბავშვები შიმშილობენ იქიდან გამომდინარე, რომ ძალიან რთული სოციალურ-ეკონომიკური ფონია ქვეყანაში და სიღარიბე ერთ-ერთი ყველაზე მძიმე და დაუძლეველი პრობლემა. ასეთ პირობებში სულაც არ არის გასაკვირი, რომ ეს პრობლემა არსებობდეს. მაგრამ თუ პრობლემას თვალს არ გაუსწორებ და მის უარყოფაზე გააკეთებ აქცენტებს, მერე ძალიან რთულია მის გამოსწორებაზე სათანადოდ იმუშაო", — განაცხადა ხულორდავამ.

ქართული ოცნების დეპუტატმა, რევაზ არველაძემ კიდევ ერთხელ დააყენა ეჭვქვეშ ის ფაქტი, რომ საქართველოში ბავშვები შიმშილობენ. მან პარლამენტის სხდომაზე ჯანდაცვის მინისტრს, ეკატერინე ტიკარაძეს ჰკითხა მას გაეცა პასუხი შიმშილობენ თუ არა საქართველოში ბავშვები.

გუშინ, 4 თებერვალს არველაძემ მთავარ არხთან საუბრის დროს თქვა, რომ საქართველოში ბავშვები არ შიმშილობენ. დეპუტატი, რომელსაც არ სჯერა, რომ ქვეყანაში ყოველი მეხუთე ბავშვი შიმშილობს, რამდენიმე ათეული ათასის ღირებულების ქონებას ფლობს.