7 წლის ტეხასელმა ბიჭმა, რომელიც დედასთან ერთად ოჯახში ძალადობის მსხვერპლთა თავშესაფარში ცხოვრობს, სანტას წერილი დაუწერა. მასში ის საჩუქრებთან ერთად ისეთ რამეს ითხოვს, რასაც ფულით ვერავინ იყიდის.

წერილი, რომელიც თავშესაფრის ფეისბუქ გვერდზე გამოქვეყნდა, ბავშვი წიგნებს, ლექსიკონს, საათსა და კომპასს ითხოვს — თუმცა, მისი ყველაზე დიდი სურვილი "ძალიან, ძალიან, ძალიან კარგი მამაა".

წერილი ბიჭუნას ზურგჩანთაში დედამ იპოვა და თავშესაფრის თანამშრომლებს აჩვენა. მასში ვკითხულობთ:

ძვირფასო სანტა,

სახლის დატოვება მოგვიწია. მამა ძალიან გაბრაზებული იყო. სახლში საქმეების კეთება ჩვენ გვიწევდა, მამას კი ყველაფერი ჰქონდა, რაც უნდოდა. დედამ თქვა, რომ წასვლის დრო იყო და რომ უფრო უსაფრთხო ადგილას წავიდოდით, იქ, სადაც არ შეგვეშინდებოდა.

მე ჯერ კიდევ ვნერვიულობ, სხვა ბავშვებთან ლაპარაკი არ მინდა. აპირებ ამ შობას რომ მოხვიდე? აქ ჩვენი ნივთები არ გვაქვს. შეგიძლია წამომიღო საბავშვო წიგნები, ლექსიკონი, და კიდევ კომპასი და საათი? კიდევ მინდა ძალიან, ძალიან, ძალიან კარგი მამა. ამასაც შეძლებ?

სიყვარულით, ბლეიკი.

ფოტო: SafeHaven of Tarrant County

ოჯახის უსაფრთხოებისთვის, ბიჭის სახელი შეცვლილია და მას სინამდვილეში ბლეიკი არ ჰქვია. მასთან ერთად თავშესაფარში დედა და კიდევ ორი მცირეწლოვანი დედმამიშვილია.

"ოჯახური ძალადობის ზრდასრული მსხვერპლები ცდილობენ საუკეთესო გადაწყვეტილება მიიღონ შვილებისა და საკუთარი თავის უსაფრთხოებისთვის. შეიძლება ეს უცხო თვალისთვის რთული გასაგებია, მაგრამ ისინი ზრუნავენ შვილების აკადემიურ მოსწრებაზე და ოჯახის დასატოვებლად ისეთ დროს ირჩევენ, როდესაც მათ არდადეგები აქვთ და სკოლის გაცდენა არ მოუწევთ", — ამბობს თავშესაფრის პრეზიდენტი ქეთრინ ჯეიკობსი CNN-თან. თავშესაფარში ოჯახები 8-10 კვირით რჩებიან. იქამდე, სანამ ცხოვრების უსაფრთხოდ გაგრძელების გზას არ იპოვიან.

პატარა ბიჭის წერილმა ფეისბუქის მომხმარებლებში თანაგრძნობა გამოიწვია. ისინი მის ოჯახსა და თავშესაფარს სხვადასხვა ნივთებითა და ფულად დახმარებას დაჰპირდნენ, ზოგიერთმა მათგანმა კი საკუთარი გამოცდილებაც გააზიარა. როგორც პოსტის კომენტარებიდან ირკვევა, შემოწირულობის საიტი ქველმოქმედების მსურველი ვიზიტორების რაოდენობის გამო დროებით გადაიტვირთა კიდეც. ამ შობას "ბლეიკი" აუცილებლად შეხვდება სიყვარულითა და მზრუნველობით სავსე უსაფრთხო გარემოში.