ზუგდიდში ნაციონალური მოძრაობის ოფისთან ქართული ოცნების მხარდამჭერები აქციას მართავენ. მათ ნაციონალური მოძრაობის ოფისს კვერცხები ესროლეს.

აქციის მონაწილეებმა ადგილზე ბანერები მიიტანეს წარწერით "გვახსოვს 7 ნოემბერი" და "არ დავუშვებთ". ნაციონალური მოძრაობის მხარდამჭერებმა კი საკუთარი ოფისის ფანჯრებიდან დოლარის კუპირები გადმოყარეს. შეძახილები ისმის ორივე მხრიდან — "მონებო" და "მკვლელებო".

ზუგდიდის მსგავსად, დაპირისპირება იყო ქობულეთის საკრებულოსა და მცხეთის მერიასთან, ოპოზიციის აქციის პარალელურად ქართული ოცნების მხარდამჭერების კონტრაქციაც იმართებოდა. აქციაზე ქართული ოცნების მხარდამჭერები განსაკუთრებული აგრეისულობით გამოირჩეოდნენ ოპოზიციის ლიდერების მიმართ. ნაციონალური მოძრაობის წევრს ზაალ უდუმაშვილს ცოცხი ესროლეს, ხოლო ევროპული საქართველოს ერთ-ერთ ლიდერს გიგა ბოკერიას წყალი შეასხეს.

2 დეკემბრის კი ქართული ოცნების ახალგაზრდული ფრთის წევრებმა და პარტიის სხვა მხარდამჭერებმა მმართველი პარტიის ოფისთან კონტრაქცია გამართეს. ისინი სიტყვიერ შეურაცხყოფას აყენებდნენ და ფიზიკურად უსწორდებოდნენ მოძრაობა #სირცხვილიას, გაბედეს და შეცვალეს აქტივისტებს. აქტივისიტები ამბობენ, რომ აგრესიული პირები მათ ესროდნენ შუშხუნებს, რომელიც ერთ-ერთ აქტივისტს თვალში მოხვდა. მათივე თქმით, დაშავდა 5 ადამიანი.