ჩვენმა მკითხველმა უკვე იცის იტალიის ჩრდილოეთით მდებარე ერთ-ერთ პატარა ქალაქზე, ლოკანაზე, სადაც საცხოვრებლად ჩასულებს $10 ათასს სთავაზობდნენ.

ამჯერად კი ჩვენი ყურადღება ხმელთაშუა ზღვის ყველაზე დიდ კუნძულზე, სიცილიაში მდებარე იტალიურმა ქალაქმა, ბივონამ მიიქცია, სადაც სახლები სულ რაღაც, 1 დოლარად იყიდება. ფაქტიურად ესფრესოზე იაფად.

ფოტო: Salvatore Giallombardo

სახლების ყიდვის მსურველებს, გარდა იმისა, რომ მოძველებული უძრავი ქონება თითქმის უფასოდ გადაეცემა, ადგილობრივი ხელისუფლება წახალისების მიზნით სხვა ბონუსებსაც ჰპირდება.

ამის მიზეზი კი როგორც ყოველთვის ისაა, რომ მოსახლეობა პატარა ქალაქებს ტოვებს და უკეთესი სამსახურისა და საცხოვრებელი პირობების მოსაძებნად, შედარებით დიდ ქალაქებში მიგრირებს.

ფოტო: Camela La Mela Veca

"ბოლო 40 წლის განმავლობაში ჩვენი მოსახლეობის რაოდენობა თითქმის განახევრდა. ახლა ბივონაში 3 800 ადამიანი ცხოვრობს", — ამბობს ქალაქის კულტურის მრჩეველი, ანჯელა კანიზარო.

შემოთავაზებული სახლების უმრავლესობა, რომელთა შესახებ უფრო დეტალური ინფორმაცია მალე გამოქვეყნდება, საკმაოდ ცუდ მდგომარეობაშია და ხელის შევლებაც სჭირდება. თუმცა, მათთვის, ვინც პატარა, მშვიდ და ლამაზ ქალაქში ახალი ცხოვრების დაწყებაზე ოცნებობს, ამ შანსის ხელიდან გაშვება ნამდვილად არ ღირს.