მსოფლიო ლიტერატურის ერთ-ერთი ყველაზე გამორჩეული კლასიკოსი მწერლის, შარლოტა ბრონტეს უიშვიათესი მინიატურული ხელნაწერი წიგნი ინგლისში, ვესტ-იორკშირში მდებარე ბრონტეების სახლ-მუზეუმს დაუბრუნდება.

წიგნი, რომლის მოცულობაც სულ რაღაც 35x61 მილიმეტრია, აუქციონზე 600 000 ევროდ Bronte Society-მ შეიძინა, რომელმაც ეს თანხა ათასამდე ადამიანის შემოწირულობით შეაგროვა.

შარლოტა ბრონტეს ამ იშვიათ ხელნაწერს ახალგაზრდა კაცის ჟურნალი ჰქვია, რომელიც მწერალმა 1830 წელს, თოთხმეტი წლის ასაკში დაწერა. ჯერ კიდევ მცირე ასაკში ეს სახელოვანი მწერალი მინიატურული წიგნების ექვსნაწილიან სერიას წერდა — ერთი დაკარგულია, დანარჩენი ხუთს უკვე იცავს ბრონტეს სახლ-მუზეუმი.

ამ ექვსწიგნიან სერიას მწერალი თავისი სათამაშო ჯარისკაცებისთვის წერდა. მათ შორის ბოლოს აღმოჩენილი ეს ხელნაწერი იმ პასაჟებსაც შეიცავს, რომელსაც შემდგომში შარლოტა ბრონტეს ყველაზე ცნობილ რომანში, ჯეინ ეარი ვხვდებით.

"რაც შეგვეძლო, ყველაფერს ვაკეთებდით, რომ ეს უჩვეულოდ პატარა წიგნი შარლოტა ბრონტეს სახლ-მუზეუმში დაგვებრუნებინა და ახლა დაუჯერებელიც კია, რომ ეს ხელნაწერი იქ ბრუნდება, სადაც 189 წლის წინ შეიქმნა," - აცხადებს კიტი ვრაითი, Brontë Society-ის აღმასრულებელი დირექტორი.