ქართული ოცნების დეპუტატი, რევაზ არველაძე აცხადებს, რომ ის პოზიციას არ იცვლის და კვლავ პროპორციული საარჩევნო სისტემის მომხრედ რჩება. იგი მიიჩნევს, რომ ეს ინიციატივა გავა და "თითებზე ჩამოსათვლელი" მოწინააღმდეგეები საფრთხეს ვერ შეუქმნიან:

"მე ვარ იმ 93 ინიციატორს შორის, რომლებმაც დააყენეს ეს საკითხი. იმათი არ ვიცი და ყოველ შემთხვევაში მე პოზიციას არ ვიცვლი. არამგონია, რიგგარეშე არჩევნები როგორ უნდა დანიშნის, მითხარით. მაშინ თვითონ პარლამენტმა უნდა გამოიტანოს დადგენილება. სხვანაირად როგორ? მაშინ უნდა ჩავაგდოთ ბიუჯეტი რამდენჯერმე, ეგეთი რაღაც არ ემუქრება. რამდენი იქნება წინააღმდეგი მე ამას ვერ ვიტყვი, მაგრამ მგონია თითებზე დასათველია ეგეთი, ამდენად საფრთხე არ ემუქრება".

პროპორციულ წესზე გადასვლას პარლამენტმა კენჭი გუშინ, 12 ნოემბერს არ უყარა. პარლამენტის თავმჯდომარეს არ უთქვამს, რომ პროცესი გადაიდო, თუმცა, სხდომა კენჭისყრის გარეშე დაასრულა. კენჭისყრა, სავარაუდოდ, 13 ნოემბერს გაიმართება. მანამდე უმრავლესობის სხდომა ჩაინიშნა, სადაც ეს საკითხი განიხილება.

საკონსტიტუციო ცვლილებას მხარს უჭერდნენ ნაციონალური მოძრაობა და ევროპული საქართველო. ცვლილებას ეწინააღმდეგებოდა ქართული ოცნების რამდენიმე მაჟორიტარი დეპუტატი. უმრავლესობის ზოგიერთი წარმომადგენელი კენჭისყრის გადადებას ითხოვდა.