საქართველოს უკვდავი პოლკი იუსტიციის სამინისტროში სახალხო-პატრიოტულ მოძრაობად დაარეგისტრირა. ამის შესახებ ინფორმაცია პოლკის ფეისბუქგვერდზე რუსულ ენაზე გავრცელდა.

საჯარო რეესტრის მონაცემების მიხედვით, საქართველოს უკვდავი პოლკის ხელმძღვანელი რევაზ გოგიძეა. ის აქამდეც ხელმძღვანელობდა პოლკის მარშებს, რომელიც საქართველოში 2017 წლიდან იმართება. გოგიძე ამტკიცებდა, რომ მათი მსვლელობა რუსეთიდან არ ფინანსდებოდა.

უკვდავი პოლკი არის მოძრაობა, რომელიც თავის მთავარ მიზნად "სამამულო ომში" დაღუპულთა ხსოვნის უკვდავყოფას ასახელებს, თუმცა კრემლის პროპაგანდის ერთ-ერთი ყველაზე ძლიერი იარაღია. პოლკის იდეა 2011 წელს გაჩნდა, კრემლის ფინანსური მხარდაჭერით კი 2015 წლიდან საერთაშორისო მასშტაბის გახდა და 17 ქვეყანაში გაიმართა.

პოლკის ოფიციალურ საინფორმაციო ვებგვერდზე საქართველოს ოკუპირებული ტერიტორიები დამოუკიდებელ სახელმწიფოებად არის წარმოდგენილი. ტრადიციულად, პოლკი მსვლელობებს ატარებს საქართველოს ოკუპირებულ რეგიონებშიც.

რუსეთის პრეზიდენტი ვლადიმერ პუტინი ამბობდა, რომ ეს მოძრაობა "ისტორიული სიმართლის დაცვას ემსახურება", რომელმაც "საზოგადოება და ხალხები სულიერად უნდა შეადუღაბოს და ისტორიის რევიზიის უფლება არავის მისცეს".

გაიგეთ მეტი: