კომიკოსი და ტელეწამყვანი ელენ დეჯენერესი კრიტიკას პასუხობს, რომელიც მას შემდეგ მიიღო, რაც ყოფილ პრეზიდენტ ჯორჯ ბუშ უმცროსთან ერთად ამერიკული ფეხბურთის ყურებისას დააფიქსირეს.

დეჯენერესი და ბუში თამაშს პარტნიორებთან, პორშა დე როსთან და ლორა ბუშთან ერთად ესწრებოდნენ. ელენი ლიბერალი დემოკრატია და აშშ-ს ყოფილი პრეზიდენტი კი კონსერვატორი რესპუბლიკელი.

"ხალხმა იფიქრა, რა უნდა ამ გეი ჰოლივუდელ ლიბერალს, კონსერვატორ რესპუბლიკელ პრეზიდენტთან ერთად რომ ზის? ბევრი ადამიანი გაბრაზდა და მათ გააკეთეს ის, რასაც გაბრაზებული ადამიანები აკეთებენ — ტვიტერზე წერეს", — ამბობს დეჯენერესი გადაცემის მონოლოგში.

თუმცა მან პოზიტიურ ნაწილზეც გააკეთა აქცენტი და ფავორიტი ტვიტი დაასახელა, რომელშიც ეწერა:

"ელენისა და ჯორჯ ბუშის ერთობა ამერიკის მიმართ რწმენას მიბრუნებს".

კომიკოსმა დასძინა, რომ ბუში მისი მეგობარია:

"მე ვმეგობრობ ჯორჯ ბუშთან. სინამდვილეში ბევრ ისეთ ადამიანთან ვმეგობრობ, რომლებიც ჩემს რწმენას და შეხედულებებს ყველაფერში არ იზიარებენ. ჩვენ ყველანი განვსხვავდებით და მგონი დაგვავიწყდა, რომ უფლება გვაქვს, განსხვავებულები ვიყოთ.

მაგალითად, ვისურვებდი, რომ ადამიანებმა ბეწვის სამოსი არ ატარონ, მაგრამ ჩემი რამდენიმე მეგობარი ბეწვიან ტანსაცმელს იცვამს. იმის გამო, რომ ვიღაცას ყველაფერში არ ვეთანხმები, არ ნიშნავს, რომ მასთან მეგობრობა არ მინდა. როცა ვამბობ, რომ ერთმანეთის მიმართ კეთილები უნდა ვიყოთ, არ ვგულისხმობ მხოლოდ მათ, ვინც ჩვენსავით ფიქრობენ. მე ვგულისხმობ, რომ კეთილშობილება ყველას მიმართ უნდა გამოვიჩინოთ".

ამერიკის 43-ე პრეზიდენტი ჯორჯ ბუში 2017 წელს ელენის გადაცემაში სტუმრადაც იყო მიწვეული.