ავსტრალიელი მუსიკოსი და მომღერალი სია ფერლერი ამბობს, რომ ქრონიკული ტკივილით იტანჯება. დაავადებას, რომელიც მას აქვს, ელრეს-დენლოსის სინდრომი ჰქვია.

მათ, ვინც იგივე მდგომარეობით ტკივილს განიცდის, სიამ თანადგომა გამოუცხადა და უთხრა, რომ ისინი მარტონი არ არიან:

"ჰეი, მე ვიტანჯები ქრონიკული ტკივილით,რომელიც ნევროლოგიური დაავადებითაა გამოწვეული და ამ მდგომარეობას ელრეს-დენლოსი ჰქვია. მინდოდა მეთქვა ყველასთვის, ვინც განიცდის ტკივილს, ემოციურს თუ ფიზიკურს, რომ მე თქვენ მიყვარხართ და განაგრძეთ ცხოვრება. ცხოვრება საშინლად რთულია, ტკივილი გამანადგურებელია, თუმცა თქვენ მარტონი არ ხართ".

ავსტრალიელი მუსიკოსი გულწრფელია ისეთ თემებზე საუბრისას, როგორიცაა ნარკოტიკებზე და სასმელზე დამოკიდებულება, თუმცა ამ სინდრომზე აქამდე საჯაროდ არ უსაუბრია. ამერიკის ჯანმრთელობის ეროვნული ინსტიტუტის მიხედვით, სინდრომი 5 ათასიდან ყოველ ერთ ადამიანს აქვს. სიას ტვიტს უამრავი ადამიანი გამოეხმაურა და მომღერალს დაავადების შესახებ ცნობიერების ამაღლებისთვის მადლობაც გადაუხადა.

სიას სასცენო იმიჯი გამორჩეულია, ის ხშირად საკუთარ სახეს ფარავს. სია სურს, რომ მსმენელმა აქცენტი მის ვოკალურ მონაცემებზე და შემსრულებლის ემოციაზე გააკეთოს. მუსიკოსი ცნობილია ისეთი სიმღერებით, როგორიცაა Chandelier და Cheap Thrills. ის წერს სიმღერებს ისეთი ცნობილი პოპ-მომღერლებისთვის, როგორებიც არიან რიანა, ბიონსე, ბრიტნი სპირსი და ადელი.