ადამიანის უფლებათა კომიტეტის ხელმძღვანელმა, სოფო კილაძემ პარლამენტს დღეს, 2 ოქტომბერს 2018 წლის ანგარიში წარუდგინა. დოკუმენტში არ იყო ნახსენები ისეთი გახმაურებული საქმეები, როგორიცაა წარმოშობით აზერბაიჯანელი ჟურნალისტის აფგან მუხტარლის საქართველოდან გაუჩინარება, თემირლან მაჩალიკაშვილის საქმე, ეთნიკურ ნიადაგზე მოკლული ვიტალი საფაროვის შემთხვევა და ა.შ. ამ საკითხზე ყურადღება ოპოზიციის წარმომადგენლებმა გაამახვილეს.

"სიცოცხლის უფლება — მაჩალიკაშვილის საქმე; ადამიანის გაუჩინარების პრობლემები — მუხტარლის საქმე; წამება, არაადამიანური მოპყრობის რამდენიმე შემთხვევა; სამართლიანი სასამართლოს უფლება — ხორავას ქუჩის საქმე; გამოხატვის თავისუფლება — ტელევიზიებზე შეტევა. ახლა, მე რაც ჩამოვთვალე, არის აშშ სახელმწიფო დეპარტამენტის მოხსენებაში, რომ გადაავლოთ თვალი, პუნქტებად გამოყოფილი... როგორ მოახერხეთ, რომ არც ერთ ამაზე თქვენს მოხსენებაში არ გიწერიათ არაფერი", — თქვა ევროპული საქართველოს დეპუტატმა, სერგი კაპანაძემ.

12-გვერდიანი ანგარიში ექვსი ქვეთავისგან შედგება და ძირითადად, აქცენტი კომიტეტის მიღწევებზეა. დოკუმენტში არ მოხვდა გახმაურებული საქმეები, თუმცა ადგილი დაეთმო კომიტეტის თავმჯდომარის, სოფო კილაძის თავის მაჟორიტარულ ოლქში მოქალაქეებთან შეხვედრის შესახებ ინფორმაციას.

სწორედ ამ საკითხზე გაამახვილა ყურადღება ევროპული საქართველოს კიდევ ერთმა დეპუტატმა, ხათუნა გოგორიშვილმა:

"რა არის თქვენს ანგარიშში, გარდა იმისა, რომ ნაძალადევის მაჟორიტარად კარგად მუშაობთ? ამის გარდა, ადამიანის უფლებების დაცვაზე რამეს აკეთებთ?"

სოფო კილაძე ამბობს, რომ მისთვის ოპოზიციის დამოკიდებულება "გასაგებია" და მათ ნათქვამს "წიოკს" უწოდებს:

"მოვიდნენ, იწიოკეს უსაფუძვლოდ... სირცხვილია, რომ არ იცის ზოგიერთმა ოპოზიციონერმა რა ფუნქცია ატარებს კომიტეტის ანგარიში. ეს არის ტექნიკური ანგარიში, სადაც წარმოდგენილია ის ძირითადი მიმართულებები, რაზეც მუშაობს კომიტეტი".