ქართული ოცნებაში აცხადებენ, რომ მინისტრობის კანდიდატების მოსმენებზე ოპოზიციის არდასწრება ხაზს უსვამს ოპოზიციის მცდელობებს, მოახდინოს პროცესების რადიკალიზაცია და არ იმუშაოს პრობლემურ საკითხებზე საქმიან რეჟიმში. ასე გამოეხმაურა უმრავლესობის დეპუტატი, თამარ ხულორდავა ევროპული საქართველოსა და ნაციონალური მოძრაობის მიერ მინისტრთა კაბინეტის საკომიტეტო მოსმენაზე არშესვლას.

"ოპოზიციას საქმის კეთება არ აინტერესებს და აინტერესებს ლოზუნგებით ლაპარაკი. არასდროს არ მაქვს პრობლემა, დეტალურად ვისაუბროთ პოლიტიკურ კურსზე, მაგრამ მათ ეს არ აინტერესებთ. თუ პასუხისმგებლობის მქონე ოპოზიცია ხარ და სამთავრობო გუნდს რაღაცაში ბრალს დებ, მაშინ დისკუსიაში შესვლას არ უნდა გაურბოდე და ასეთ ფორმატებს უნდა იყენებდე, რომ ეს კითხვები დასვა", — თქვა ხულორდავამ.

მინისტრობის კანდიდატების მოსმენის პარალელურად პარლამენტთან საპროტესტო აქციას ის მოქალაქეები მართავენ, რომლებიც პარლამენტში არ შეუშვეს.

საქართველოს პარლამენტში მთავრობის დამტკიცების პროცედურა დღეს, 4 სექტემბერს დაიწყო. პირველი მინისტრობის კანდიდატი, რომელსაც გაერთიანებულ კომიტეტზე უსმენენ, საგარეო საქმეთა მინისტრი დავით ზალკალიანია. დღესვე სამთავრობო პროგრამას წარადგენს ჯანდაცვის მინისტრი, ეკა ტიკარაძე და განათლების მინისტრი, მიხეილ ბატიაშვილი.