ქართულ ოცნებაში აცხადებენ, რომ ბენო ქაშაკაშვილი, რომელმაც ოკუპირებულ ტერიტორიებზე საუბრისას სიტყვები — "წაგვართვეს, გადმოწიეს ჰა-ჰა 500 მეტრი" — თქვა, მათი წევრი არაა. ქაშაკაშვილმა ამის შესახებ გუშინ, 6 მარტს ტელეკომპანია კავკასიის ეთერში ისაუბრა, სადაც ის ქართული ოცნების წევრად წარადგინეს.

ქაშაკაშვილი 2016 წლის საპარლამენტო არჩევნებისთვის ქართული ოცნების პარტიულ სიაში იყო. მან ეს სიტყვები პარტია კანონი და სამართალის დამფუძნებლის, თაკო ჩარკვიანის რეპლიკის პასუხად თქვა და აღნიშნა:

"როგორ მოვიქცეთ? კრემლს შევუტიოთ, თქვენმა პარტიამ შეუტიოს. როგორ შეიძლება? აიღე თოფი, ჩადი კრემლში და შეუტიე მერე, შევარდი შიგნით. ერთადერთი მთავრობაა შვიდი წლის მანძილზე, რომელიც ომში არ გაეხვა".

საოკუპაციო ხაზიდან საქართველოს მოქალაქეები არაერთხელ გაიტაცეს, დააპატიმრეს და შემდეგ გირაოს სანაცვლოდ გაათავისუფლეს. პარალელურად, საოკუპაციო რეჟიმის წარმომადგენლები საქართველოს კონტროლირებად ტეროტორიაზე მავთულხლართების გაბმას აგრძელებენ.