ქართულ ოცნებაში დაბრუნებულმა ირაკლი ღარიბაშვილმა განაცხადა, რომ პარტიამ ბევრი შეცდომა დაუშვა, მათ შორის ხელმძღვანელმა პირებმა. მისი თქმით, ყოფილი თანამებრძოლები ბრძოლის ველზე დატოვეს, რაც არასწორია.

"ადამიანები, რომლებიც 2012 წელს გაწირეს და მზად იყვნენ, რომ გაეწირათ საკუთარი თავი, ეს ადამიანები არ უნდა მიატოვო მერე ბრძოლის ველზე, უიარაღოდ. ამაზეა საუბარი, ამაზე ქონდა საუბარი პარტიის თავმჯდომარეს და ამის გამო დაბრუნდა პოლიტიკაშიც", — განაცხადა ღარიბაშვილმა.

ღარიბაშვილმა აღნიშნა, რომ ბოლო სამ წელიწადში განვითარებულმა პროცესებმა ქართული ოცნების ამომრჩეველიც გაანაწყენა. მისივე თქმით, ეს გამოსწორებადია და პარტიას აქვს ხედვა, გამოცდილება და რესურსი პრობლემების მოსაგვარებლად.

"თანამდებობები არის დროებითი, ჩემო ძვირფასებო. მარადიული არის უფალი და სამშობლო", — ასე დაიბარა სამი წლის წინ თანამდებობიდან გადამდგარმა პრემიერმა ირაკლი ღარიბაშვილმა. დღეს, 5 მარტს ის პოლიტიკაში დაბრუნდა და ქართული ოცნების პოლიტიკურ მდივნად, ასევე პარტიის პოლიტსაბჭოს წევრად დაინიშნა. ამას წინ უძღოდა შეუთანხმებლობა პარტიაში მოსამართლეების არჩევის საკითხზე, დეპუტატების უმრავლესობიდან გადინება.