ქართული ოცნების ოფისში პოლიტსაბჭოს სხდომა მიმდინარეობს. უცნობია, რა საკითხს განიხილავენ პოლიტსაბჭოზე, თუმცა ტელეკომპანია პირველის ინფორმაციით, ქართული ოცნება ყოფილი პრემიერ-მინისტრის ირაკლი ღარიბაშვილის პოლიტიკაში დაბრუნებას განიხილავს.

მათივე ცნობით, შეხვედრას ბიძინა ივანიშვილთან ერთად ესწრება ირაკლი ღარიბაშვილი და სხდომის დასრულების შემდეგ მედიისთვის საგანგებო პრესკონფერენცია გაიმართება.

ქართული ოცნების პრესსამსახურში On.ge-ს კითხვაზე, ესწრება თუ არა შეხვედრას ირაკლი ღარიბაშვილი და განიხილება თუ არა პოლიტიკაში მისი დაბრუნების საკითხი, გვპასუხობენ, რომ "პოლიტსაბჭოს შემდეგ გაკეთდება ან გავრცელდება განცხადება".

ღარიბაშვილის ქართულ ოცნებაში სავარაუდოდ დაბრუნებას არ ადასტურებენ ქართული ოცნების დეპუტატები. ჯანდაცვის კომიტეტის თავმჯდომარის აკაკი ზოიძის თქმით, მას ამის შესახებ ინფორმაცია არ აქვს, თუმცა ღარიბაშვილის პოლიტიკაში დაბრუნებას მიესალმება.

საპარლამენტო უმრავლესობის წარმომადგენელი დიმიტრი ხუნდაძე ამბობს, რომ თუ ირაკლი ღარიბაშვილი პარტიაში დაბრუნდება, ეს სერიოზული შევსება იქნება.

"ირაკლი ღარიბაშვილი არის ჩვენი მეგობარი, ჩვენი თანამებრძოლი 2011-2012 წლებში. ვფიქრობ, ირაკლის დაბრუნება, თუკი ეს მოხდა, იქნება პოზიტიური და ძველ თანაგუნდელებს შორის კიდევ ერთხელ გააჩენს განცდას, რომ ჩვენ ვართ ერთნი და თანამებრძოლები ერთმანეთს არ ვკარგავთ", — განაცხადა დიმიტრი ხუნდაძემ.

მისივე განცხადებით, ღარიბაშვილის დამსახურებიდან გამომდინარე, ეს პარტიის სერიოზული შევსება იქნება და გააძლიერებს პარტიულ მუშაობას.