არასამთავრობო ორგანიზაციების წარმომადგენლებისა და მოქალაქეებით დაკომპლექტებული საინიციატივო ჯგუფი აცხადებს, რომ ისინი გააგრძელებენ მობილიზებას სასამართლო სისტემის გაჯანსაღებისთვის. ასე უპასუხეს მათ ქართულ ოცნებას, სადაც აცხადებენ, რომ არ დაუშვებენ სასამართლოს უსამართლო და მიუღებელ დისკრედიტაციას.

"მმართველი პარტიის პოლიტიკურმა საბჭომ, ნაცვლად იმისა, რომ გაეაზრებინა საზოგადოების პროტესტი და გადაედგა ქმედითი ნაბიჯები სასამართლოში არსებული მძიმე ვითარების გამოსასწორებლად, 2019 წლის 5 თებერვალს მიიღო რეზოლუცია, რომლითაც თავს ესხმის სისტემის გაჯანსაღების მსურველთ, ბრალს სდებს მათ კავშირში ნაციონალურ მოძრაობასთან, მაშინ, როცა თავად მხარდაჭერას და ნდობას უცხადებს სწორედ ნაციონალური მოძრაობის დროს სასამართლოში შექმნილ და გაბატონებულ კლანს", — აღნიშნულია საინიციატივო ჯგუფის განცხადებაში.

ადვოკატი სოსო ბარათაშვილს მიაჩნია, რომ ხელისუფლებამ სისტემის მსხვერპლებად არ უნდა გამოაცხადოს მოსამართლეები, რომლების უსამართლო და უკანონო გადაწყვეტილბებს იღებდნენ:

"ბოლო წლებში მქონია არაერთი საქმე, როდესაც გახმაურებულ საქმეებზე ხელისუფლება აქტიურად იყო დაინტერესებული შედეგით. არსებობს გარკვეული სფერო, რომელსაც აკონტროლებს ხელისუფლება და ხელისუფლებას აქვს სურვილი, რომ დაიტოვოს თავისი გავლენის ქვეშ".

სასამართლო ხელისუფლების საკითხზე, არასამთავრობოებისა და საზოგადოების კრიტიკასთან დაკავშირებით ქართული ოცნების პოლიტსაბჭომ 5 თებერვალს განცხადება გაავრცელა. მმართველი პარტიის პოლიტსაბჭოში აცხადებენ, რომ პროცესი პოლიტიკური ძალების მიერ არის მართული და მისი მიზანია, დასაჯონ ყოფილი ხელისუფლების გავლენებიდან გასული "ურჩი" მოსამართლეები.

სასამართლოში სამართლისთვის — დაპირისპირება უვადო მოსამართლეობის კანდიდატების სიაზე

უზენაესი სასამართლოს მოსამართლეების სია მმართველ გუნდში დაპირისპირების მიზეზი გახდა. ამ მიზეზით, ეკა ბესელიამ იურიდიულ საკითხთა კომიტეტის დატოვა. მისი თქმით, ასე მოსამართლეების სიის დამკტკიცებას შეუშალა ხელი. ბესელიას პოზიციით, იუსტიციის უმაღლესი საბჭოს მიერ წარდგენილ სიაში მყოფი მოსამართლეები ნაციონალური მოძრაობის დანაშაულებრივ რეჟიმს უკავშირდებოდნენ და მათი არჩევა სასამართლო სისტემისა და ქართული ოცნების ღირებულებების ნგრევისკენ გადადგმული ნაბიჯი იქნებოდა.

ბესელია მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით პარლამენტს მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა. ბესელია კი ამბობდა, რომ იურიდიულ საკითხთა კომიტეტს ზარდიაშვილის ხელში ვერ დატოვებდა. ვანო ზარდიაშვილი ის დეპუტატია, რომლის "სასამართლოს გავლენიან ჯგუფებთან" კავშირებზე არასამთავრობო ორგანიზაციები ხშირად საუბრობენ. მათი ინფორმაციით, სწორედ ის იყო მმართველი პარტიისა და "სასამართლოს კლანური მმართველების" საერთო საკონტაქტო პირი.

წასვლის მიზეზებზე საუბრისას ბესელიამ განაცხადა, რომ საქართველოს პარლამენტის თავმჯდომარემ, ირაკლი კობახიძემ მას მოსთხოვა მოსამართლეების სია პარლამენტში დარეგისტრირებიდან მეოთხე დღეს განეხილა და მხარი დაეჭირა, რაზეც მან უარი განაცხადა. ამ საკითხმა ქართულ ოცნებაში დაპირისპირება გამოიწვია.

ღია დაპირისპირების შემდეგ მმართველი გუნდის დეპუტატებმა მოსამართლეების არჩევის წესთან დაკავშირებით იმსჯელეს. მათი გადაწყვეტილებით, მოსამართლეების ამჟამინდელი სიის განხილვა აღარ მოხდება. მათივე თქმით, ჯერ შემუშავდება შერჩევის კრიტერიუმები, შემდეგ კი ახალი კანდიდატები შეირჩევიან.

არასამთავრობო ორგანიზაციებმა, ყოფილმა მოსამართლეებმა და იუსტიციის საბჭოს არამოსამართლე წევრებმა სასამართლო სისტემის მურუსიძე-ჩინჩლაძის "კლანური" მმართველობიდან გათავისუფლების მოთხოვნით რამდენიმე აქცია გამართეს და მანიფესტი შეიმუშავეს. მათი თქმით, არამხოლოდ სია უნდა გაიწვიონ, არამედ იუსტიციის უმაღლესი საბჭო დაითხოვონ და ახალი მოსამართლეებით დააკომპლექტონ.

იუსტიციის უმაღლესი საბჭოს თავმჯდომარის მოვალეობის შემსრულებელმა, გიორგი მიქაუტაძემ განაცხადა, რომ ეს პროტესტი მოსამართლეების მიზანმიმართული დევნაა და არასამთავრობოებს პირადი ინტერესები ამოძრავებთ. თბილისის სააპელაციო სასამართლოს უვადო მოსამართლემ, ლევან მურუსიძემ კი თქვა, რომ არასამთავრობოების მოთხოვნა სასამართლო ხელისუფლების გადადგომის შესახებ არაკონსტიტუციურია.