აშშ-ში ე.წ. შათდაუნი, რომლის განმავლობაშიც ფედერალური მთავრობა არ ფუნქციონირებდა, დასრულდა, მხარეებს შორის შეთანხმება შედგა. ამის შესახებ ინფორმაციას CNN ავრცელებს. ტრამპმა უკვე მოაწერა ხელი დოკუმენტს, რომლის მიხედვითაც მთავრობის მუშაობა სრულად აღდგება.

გარიგების მიხედვით, ტრამპი დათანხმდა ფინანსების გამოყოფას, რომელიც 15 თებერვლამდე საკმარისი იქნება მთავრობის მუშაობის გასაგრძელებლად. ამ რიცხვამდე კი მოლაპარაკებები მთავარი ფინანსური დოკუმენტის ირგვლივ კვლავ გაგრძელდება.

ტრამპმა განაცხადა, რომ შექმნილი ვითარებიდან გამომდინარე, აუცილებელი იყო მთავრობის და ფედერალური სამსახურების მუშაობის აღდგენა, თუმცა დასძინა, რომ დემოკრატებს მაინც მოუწევთ მექსიკის საზღვართან კედლის ასაშენებლად თანხის გამოყოფა.

ე.წ. შათდაუნი, ანუ დაფინანსების არქონის გამო ფედერალური მთავრობის დახურვა, ერთ თვეს გრძელდებოდა. მთავარ წინააღმდეგობად 2019 წლის ბიუჯეტის პროექტი იქცა. მექსიკის საზღვარზე კედლის ასაშენებლად რესპუბლიკელები მიმდინარე წლის ბიუჯეტიდან $5 მილიარდის გამოყოფას ითხოვდნენ, დემოკრატები კი, რომლებიც ქვედა წარმომადგენლობით პალატაში უმრავლესობას ფლობენ, უარს ამბობდნენ კედლის მშენებლობის დაფინანსებაზე.

აღნიშნული შეთანხმებით მთავრობის მუშაობა მხოლოდ 3 კვირით - 15 თებერვლამდე აღდგება. დღეს დასრულებული შათდაუნი ამერიკის ისტორიაში ყველაზე ხანგრძლივი იყო.

ამავე თემაზე: