თბილისის მერის კახა კალაძის განცხადებით, მოქმედი კანონმდებლობით ბუნებრივი აირის ქსელების უსაფრთხოება შენობის ექსპლუატაციაში შესვლასთან კავშირში არაა. დღეს, 18 იანვარს გამართულ ბრიფინგზე კალაძემ განმარტა, რომ არქიტექტურის სამსახური, რომელიც გასცემს სამშენებლო ნებართვას, მშენებლობის დასრულების შემდეგ ამოწმებს რამდენად თანხვედრაშია ერთმანეთთან ნებართვა და დასრულებული შენობა.

რაც შეეხება დიდ დიღომში სამშენებლო კორპუსს, რომელშიც 16 იანვარს აფეთქება მოხდა, მერის თქმით, ის ექსპლუატაციაში უახლოეს დღეებში უნდა შესულიყო.

"ექსპლუატაციაში შენობის მიღებისას ბუნებრივი აირის ქსელის უსაფრთხოების შემოწმება მუნიციპალიტეტის ინსპექციისა და მერიის კომპეტენციაში არ შედის. ამას არეგულირებს მარეგულირებელი კომისიის მიერ დადგენილი რეგულაციები და ცენტრალური ხელისუფლების განკარგულებაში გაწერილი რეგულაციები", — აღნიშნა მერმა.

კახა კალაძემ ისაუბრა კანონზე, რომელიც ექსპლუატაციაში არშესულ შენობაში ცხოვრების უფლებას იძლევა. მისი თქმით, საკანონმდებლო ცვლილება 2009 წელს ნაციონალური მოძრაობის ხელისუფლების დროს მიიღეს.

16 იანვარს, საღამოს თბილისში, დიდ დიღომში, ავთანდილის ქუჩაზე საცხოვრებელი კორპუსის მეექვსე სართული, სავარაუდოდ, გაზის გაჟონვის შედეგად აფეთქდა. შემთხვევის შედეგად გარდაიცვალა ოთხი ადამიანი, მათ შორის 4 წლის ბავშვია. სხვადასხვა სახის დაზიანება მიიღო რვა ადამიანმა.

შინაგან საქმეთა სამინისტრომ გამოძიება სისხლის სამართლის კოდექსის 240¹-ე მუხლის მესამე ნაწილით დაიწყო. ამ მუხლით გაზის განლაგების, დაპროექტების ან ექსპლუატაციის დროს უსაფრთხოების წესების დარღვევა, რამაც ორი ან მეტი ადამიანის სიცოცხლე იმსხვერპლა ისჯება თავისუფლების აღკვეთით ვადით ექვსიდან ათ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

ამავე თემაზე: