თბილისში ე.წ. ქარშეარინგის, იგივე ავტომობილების გაზიარების სერვისი დაინერგება. ამის შესახებ თბილისის მერმა, კახა კალაძემ ფეისბუქლაივის პირდაპირ ეთერში განაცხადა.

კახა კალაძის განცხადებით, ე.წ. ქარშეარინგი ევროპულ ქალაქებში გავრცელებული და პოპულარი სერვისია. ამ სერვისით სარგებლობა მომხმარებელს სპეციალური აპლიკაციის საშუალებით შეეძლება, რომელსაც საკუთარ ტელეფონში გადმოწერს. აპლიკაციის საშუალებით, ასევე, შესაძლებელი იქნება სასურველი ავტომობილის დაჯავშნა, მისი გაღება და დაძვრა. ავტომობილით სარგებლობა ადამიანს მისთვის სასურველი დროით, გარკვეული თანხის გადახდის შემთხვევაში შეუძლია.

თბილისის მერის განცხადებით, პირველ ეტაპზე, თბილისში სამი მოდელის – Nissan, Renault, Smart ავტომობილები შემოვა. შემოსული 300 ელექტრომობილი, სხვადასხვა ადგილზე განთავსდება, დროთა განმავლობაში კი მათი რაოდენობა გაიზრდება; ავტომობილები ელექტრო იქნება, რაც მერის თქმით, ქალაქში ეკოლოგიურ მდგომარეობას გააუმჯობესებს.

სერვისის ფარგლებში, ქალაქში დამონტაჟდება დამტენი მოწყობილობები, მათ შორის, სწრაფი დამტენები, რომლითაც შესაძლებელი იქნება მანქანის დამუხტვა. ავტომანქანით სარგებლობის შემდეგ, ავტომობილის დატოვება მომხმარებელს თბილისის მასშტაბით ნებისმიერ პარკინგზე შეეძლება.

კახა კალაძემდე ელექტრომანქანების გაზიარების სერვისი საქართველოს პრემიერ-მინისტრმა, მამუკა ბახტაძემ დააანონსა.