თბილისის მერია იმ ჯიხურების აღებას გეგმავს, რომლებიც, ქალაქდაგეგმარების მიხედვით, დაუშვებელია და ხშირ შემთხვევაში, კანონის დარღვევითაა განთავსებული. ამის შესახებ თბილისის მერმა, კახა კალაძემ დედაქალაქის მთავრობის სხდომაზე განაცხადა.

მისი თქმით, ექვსი წლის წინ, თბილისის მაშინდელმა მთავრობამ ცუდი გადაწყვეტილება მიიღო და თბილისში 2500-მდე ჯიხური განათავსა. ამ ჯიხურების უმრავლესობას ხელშეკრულების იჯარის ვადა რამდენიმე დღის წინ ამოეწურათ.

"დღეს იმ გარემოებაში გვიწევს გადაწყვეტილების მიღება, როცა ეს 2 500 ჯიხური ამდენივე ან უფრო მეტ ადამიანს ინახავს და შესაძლოა, მათთვის ერთადერთი საარსებო წყაროც კი იყოს", — განაცხადა კახა კალაძემ მთავრობის სხდომაზე.

მისი თქმით, ჯიხურების აღება მარტივი არ იქნება და მოიჯარეებს გარკვეულ მიდგომებზე უნდა შეუთანხმდეს:

"თბილისი არ უნდა იყოს და არ იქნება ჯიხურების ქალაქი", — განაცხადა კალაძემ.

მან განმარტა, რომ ყველა ის ჯიხური, რომელიც თავისი მდებარეობით პრობლემას არ ქმნის, დარჩება, გამოცხადდება აუქციონი და ამ ჯიხურებით ადამიანები გააგრძელებენ საკუთარ საქმიანობას. ხოლო სხვა ჯიხურებს ეკონომიკური საქმიანობის გასაგრძელებლად დამატებითი დრო, 3-6 თვე მიეცემათ.

"ის ჯიხურები, რომლებიც არასწორ ადგილზეა განთავსებული უნდა გავასწოროთ, უნდა მოხდეს ადგილმონაცვლეობა და შემდეგ მათ ექნებათ საშუალება გააგრძელონ საქმიანობა", — განმარტა თბილისის მერმა.