თბილისის მერი კახა კალაძე უარყოფს გავრცელებულ ინფორმაციას, რომ აღმაშენებლის გამზირზე არა გამხმარი, არამედ ჯანსაღი ხეები მოიჭრა. მისი თქმით, თბილისის მერიამ არაერთხელ დააანონსა, რომ ოქტომბრის ბოლოდან დედაქალაქში ხეების სანიტარულ ჭრას იწყებდა.

"ეს ხეები მოიჭრა, რათა თავიდან აგვეცილებინა სხვა ჯანსაღი ხეების დაზიანება. იყო შემთხვევები, როცა გამხმარი ხეები მოტყდა და სახლები დააზიანა. მოჭრილი ხეების ნაცვლად დაირგვება ახალი ხე-მცენარეები, რომლებიც არის ნუსხით დამტკიცებული და წინასწარ ვიცით, რომელი ხეა საჭირო ჩვენი ქალაქისთვის", — განაცხადა კახა კალაძემ მთავრობის სხდომაზე.

თბილისის მერიის ინფორმაციით, მოიჭრება 20 000 ძირი დაავადებული ხე-მცენარე. აღმაშენებლის გამზირზე წლის ბოლომდე მოჭრილი ფიჭვების ნაცვლად, დაირგვება 23 ძირი სხვადასხვა სახეობის 4 მეტრზე მაღალი ხე; 8 ძირი მინდვრის ნეკერჩხალი; 7 ძირი უნგრული ცაცხვი; 9 ძირი ჭადარფოთოლა ნეკერჩხალი.