"მარცხსაც სჭირდება ღირსეულად შეხვედრა. თქვენ ხართ უღირსი დამარცხებული", — ასე გამოეხმაურა საქართველოს პარლამენტის თავმჯდომარე ნაციონალური მოძრაობის წევრს, ნიკა მელიას გამოსვლას პლენარულ სხდომაზე.

ირაკლი კობახიძის თქმით, ნაციონალური მოძრაობა უღირსი დამარცხებულია და მარცხსაც ღირსეული შეხვედრა სჭირდება.

"ბატონო ნიკა, თქვენი გამოსვლა იყო სავსე შეურაცხყოფით, ცილისწამებით. მოგიწოდებთ, სარკეში ჩაიხედეთ და დაინახავთ თქვენს დამარცხებულ სახეს, დაკარგულ სახეს. არ შეიძლება, მარცხმა ასე დაგაკარგვინოთ სახე. სირცხვილია", — განაცხადა ირაკლი კობახიძემ.

საპრეზიდენტო არჩევნების საკითხს საქართველოს პარლამენტში ნაციონალურ მოძრაობის წევრ ნიკა მელიასა და პატრიოტთა ალიანსის წევრებს, ირმა ინაშვილსა და ემზარ კვიციანს შორის ფიზიკური დაპირისპირება მოჰყვა. რამდენიმე დეპუტატს შორის დაწყებული ჩხუბი პოლიტიკურ მხარეებს შორის დაპირისპირებაში გადაიზარდა.