დედაქალაქის მთავრობის სხდომაზე, მერმა, კახა კალაძემ განაცხადა, რომ ვარკეთილის მეტროსადგურის სარეაბილიტაციო სამუშაოები არაფრად ვარგოდა. მეტროში ჭერის ჩამონგრევიდან ათი თვის შემდეგ მერი ამბობს, რომ ამაზე საუბარი უკვე დადასტურებულად შეუძლია.

კალაძის თქმით, ექსპერტიზის ბიუროს დასკვნამ ცხადყო, რომ ვარკეთილის მეტროში დამატებითი საპროექტო სამუშაოები და კვლევებია ჩასატარებელი. მისივე თქმით, რეაბილიტაცია მომავალი წლიდან დაიწყება.

ახალგარემონტებულ მეტროსადგურ ვარკეთილში ჭერი 30 იანვარს ჩამოვარდა, რის შედეგად 14 ადამიანი დაშავდა. სადგურის განახლებაზე კომპანია შპს ყვარელრემმშენმა იმუშავა, რომელიც თბილისის მერიაში ელექტრონული ტენდერის გზით შეარჩიეს. მასთან 347 852 ლარის ხელშეკრულება 2016 წლის 30 ნოემბერს დაიდო. მეტროს საპროექტო სამუშაოების მიღება-ჩაბარება ტექნიკური ექსპერტიზის გარეშე განხორციელდა.

მთავრობის სხდომაზე მერმა ისაუბრა იმაზეც, რომ ანალოგიური მდგომარეობაა გურამიშვილი მეტროს პროექტზეც. მისი თქმით, სამგორის მეტროს სარეაბილიტაციო პროცესი დეკემბრის ბოლოს დასრულდება. 2019 წლის იანვრის ბოლოს კი დასრულდება ავლაბრის მეტროს რეაბილიტაცია. მისივე თქმით, დაწყებულია მეტროს ვაგონები რეაბილიტაცია და თებერალში მეტროს კიდევ 4 ახალი შემადგენლობა დაემატება.

სხდომაზე კალაძემ 2018 წლის ბიუჯეტიც მიმოიხილა. მისი თქმით, 2018 წელს ჯანდაცვის და სოციალური პროექტებისთვის 306 მილიონი დაიხარჯა და 170000-მა ადამიანმა ისარგებლა მომსახურებით. მისივე თქმით, ამ მიმართულებით მომდევნო წლის ბიუჯეტში დაატებით 27 მილიონია გამოყოფილი. თბილისის მერიის 2019 წლის ბიუჯეტი 921 მილიონი ლარია. კალაძის განცხადებით, სპეცტრანსფერებით ბიუჯეტი მილიარდს გადააჭარბებს.