პარტია ევროპულ საქართველოში აცხადებენ, რომ მათი ინფორმაციით ხელისუფლება გეგმავს სოფელ ვეჯინში ნაციონალური მოძრაობის წარმომადგენლის სახლში ე.წ. მოლოტოვის კოქტეილის შეგდება მათ დააბრალოს.

პარტიაში მიაჩნიათ, რომ ეს "სამარცხვინო კამპანიის" გაგრძელებაა:

"ხელისუფლება მომხდარ დანაშაულებებში მოძალადეებისთვის ხელის დაფარების და პოლიტიკურად მათი მხარდაჭერის გადაფარვას მორიგი პროპაგანდით ცდილობს. ამის ნაწილია ოპოზიციის წინააღმდეგ ჩადენილი კრიმინალის ისევ ოპოზიციისთვის დაბრალება.

ამაზე საზოგადოების პასუხი არჩევნებზე მისვლა და ჯერ საპრეზიდენტო და შემდგომ საპარლამენტო არჩევნებში ხელისუფლების მშვიდობიანად დამარცხება უნდა იყოს".

დღეს საღამოს, 25 ნოემბერს რუსთავში გაერთიანებული ოპოზიციის წევრს სახლის აივანზე ე.წ. მოლოტოვის კოქტეილი ესროლეს. ინციდენტის დროს არავინ დაშავებულა. საქმეზე შსს-მ უკვე დაიწყო გამოძიება სხვისი ნივთის დაზიანების მუხლით.

22 ნოემბერს გურჯაანში, სოფელ ვეჯინში ნაციონალური მოძრაობის კოორდინატორის, ელმირა ბეციაშვილის ეზოში ისროლეს ე.წ. მოლოტოვის კოქტეილი.