დედაქალაქის მერიის შენობის გაყიდვა ამ ეტაპზე არ იგეგმება. ამის შესახებ On.ge-ს თბილისის მერიაში განუცხადეს. უწყების ქონების მართვის სამსახურის ცნობით, ცვლილების შემთხვევაში საზოგადოებას ეცნობება.

დედაქალაქის მერიის შენობის პრივატიზაციის შესახებ ინფორმაცია საინფორმაციო სააგენტო ინტერპრესნიუსმა წყაროზე დაყრდნობით გაავრცელა. გამოცემის ცნობით, ამ დროისთვის განიხილება ოთხი სხვადასხვა ტერიტორია, სადაც მერია, შესაძლოა, გადავიდეს.

ერთ-ერთ ვარიანტად თბილისის ზღვაზე, მუნიციპალურ საკუთრებაში არსებული ტერიტორია განიხილება, რომლის შესწავლაც მერიას უკვე დაწყებული აქვს. ასევე განიხილება აღმაშენებლის გამზირზე მდებარე ე.წ. მიხაილოვის საავადმყოფოს ადმინისტრაციის ყოფილი შენობა.

გამოცემის არაოფიციალური ინფორმაციით, თბილისის მერიის შენობაში სასტუმროს განთავსება იგეგმება.