რამდენიმე დღის წინ ჟურნალ ფლეიბოის გერმანულმა გამოცემამ ლეგენდარული კომპოზიტორის ენიო მორიკონეს ინტერვიუ გაავრცელა, სადაც მორიკონე ტარანტინოს აკრიტიკებდა და მას კრეტინს უწოდებს.

კომპოზიტორი, რომელმაც კარიერაში პირველი და ამ დრომდე ერთადერთი ოსკარი კვენტინ ტარანტინოს ფილისთვის, The Hateful Eight, დაწერილი მუსიკით აიღო, ჟურნალ ფლეიბოისთან ინტერვიუში ამბობდა:

"ტარანტინო ძალიან ქაოტურია. ფიქრის გარეშე ლაპარაკობს და ყველაფერს ბოლო წუთს აკეთებს. შეუძლია ფილმის გამოსვლამდე რამდენიმე დღით ადრე მთელი მუსიკის დაწერა მოგთხოვოს, რაც შეუძლებელია. ეს ძალიან მაბრაზებს. ტარანტინო ჩვეულებრივი კრეტინია. მხოლოდ ის შეუძლია, რომ იდეები სხვებს მოპაროს, საკუთარი არაფერი გააჩნია, ეს კი მას რეჟისორად ვერ აქცევს. ტარანტინოს არაფერი აქვს საერთო ჯონ ჰიუსტონთან, ალფრედ ჰიჩკოკთან ან ბილი უაილდერთან. ისინი შეუდარებლები იყვნენ", -

მუსიკოსი ასევე იხსენებს 2016 წელს აღებულ ოსკარსაც:

"ზურგის ტკივილის მეტი იმ საღამოს არაფერი მიმიღია და თუ სცენაზე ბედნიერი ვჩანდი, ეს მხოლოდ იმიტომ, რომ ვხვდებოდი ეს მოსაწყენი ცერემონია მალე დასრულდებოდა და სახლში წავიდოდი", - იხსენებს მორიკონე.

მოგვიანებით ჟურნალის მიერ გავრცელებულ ამ ინტერვიუს მორიკონე გამოეხმაურა და თქვა, რომ მას ამ გამოცემასთან არასდროს უსაუბრია.

"არასდროს მიმიცია ფლეიბოისთვის ინტერვიუ, ის რაც მათ დაწერეს სრული სიცრუეა. არასდროს მიწოდებია ტარანტინოსთვის კრეტინი და მისი ფილმები არასდროს მომიხსენებია, როგორც ნაგავი. მე მქონდა პატივი მემუშავა ამ შეუდარებელ რეჟისორთან და მისი ფილმებისთვის დამეწერა მუსიკა. მეტიც, მე კვენტინ ტარანტინოს ჩვენი დროის ერთ-ერთ ყველაზე დიდებულ რეჟისორად მივიჩნევ", - ამბობს ენიო მორიკონე.

კომპოზიტორის ამ განცხადებას არ გამოხმაურებია გერმანული ფლეიბოის რედაქცია.