მასაჩუსეტსის ტექნოლოგიური ინსტიტუტის მიერ გამოქვეყნებულ კვლევაში განხილულია იდეა, რომელიც ძლიერი ლაზერით უცხოპლანეტელებთან კომუნიკაციის დამყარებას გულისხმობს.

კვლევა The Astrophysical Journal-ში ორი დღის წინ გამოქვეყნდა.

მეცნიერები ვარაუდობენ, რომ თუ ერთი, ან ორი მეგავატის სიმძლავრის მქონე ლაზერს უზარმაზარი 45-მეტრიანი ტელესკოპით კოსმოსში მივმართავთ, უცხო ცივილიზაციებისთვის მის მიერ გამოყოფილი რადიაციის მზისგან განცალკევება შესაძლებელი იქნება.

აღნიშნული სიგნალი დედამიწიდან 20 000 სინათლის წელიწადზე გავრცელდება.

"წარმატებული კონტაქტის შემთხვევაში ჩვენ ლაზერის სხივით ინფორმაციის გადაცემასაც შევძლებთ, უფრო კონკრეტულად კი წამში რამდენიმე ასეული ბიტის გაგზავნას", - აცხადებს მასაჩუსეტსის ინსტიტუტის აერონავტიკისა და ასტრონავტიკის დეპარტამენტის სტუდენტი და კვლევის ავტორი ჯეიმს კლარკი.

"ეს რთული პროექტია, თუმცა დღეს არსებული ტექნოლოგიით მსგავსი სისტემის შექმნა უკვე შესაძლებელია. ასეთი სიგნალის დაფიქსირებას უცხო გონიერი ცივილიზაციები ადვილად შეძლებენ, რადგან ლაზერი ჩვენს მზის სისტემას უნიკალურ "შესახედაობას" მისცემს", - აცხადებს ავტორი.

კლარკის თქმით, უმჯობესია, რომ ისევე როგორც ობსერვატორიები, მსგავსი სისტემა მაღალ მთაზე აშენდეს, რათა ლაზერის სხივზე დედამიწის ატმოსფეროს გავლენა მინიმუმამდე დავიყვანოთ.

თუმცა გასათვალისწინებელია, რომ ასეთი ტიპის ლაზერს საკმაოდ მაღალი ენერგიის სხივი ექნება და მან შესაძლოა ორბიტაზე არსებული სატელიტებიც კი დააზიანოს. ავტორის თქმით, მსგავსი სისტემის შექმნა ყველაზე უსაფრთხო მთვარის ბნელ მხარეს იქნება.

კვლევაში ასევე განხილულია შევძლებთ თუ არა ჩვენ უცხოპლანეტელების მსგავსი სიგნალის დაფიქსირებას. კლარკის გამოთვლებით, ერთმეტრიანი ან უფრო დიდი ტელესკოპი მსგავსი სიგნალის აღმოჩენას შეძლებდა, ოღონდ მხოლოდ იმ შემთხვევაში, თუ მას პირდაპირ სიგნალის წყაროზე მივმართავდით.

"ამჟამინდელი ტექნოლოგიით მსგავსი სიგნალის დაფიქსირება ნაკლებად სავარაუდოა, თუმცა ჩვენ ნელ-ნელა უფრო და უფრო მეტი ეგზოპლანეტის ინფრაწითელ სპექტრს ვსწავლობთ, ხოლო კოსმოსის ახალი რუკები კი უფრო დეტალური ხდება, ამ ყველაფრის გათვალისწინებით, ჩვენ მომავალში მსგავსი სიგნალების დაფიქსირებას, თუ, რა თქმა უნდა, ისინი არსებობს, აუცილებლად შევძლებთ", - აცხადებს კლარკი.