მაშველებისა და ფლეიბოის ვარსკვლავმა პამელა ანდერსონმა ავსტრალიის 60 წუთს ინტერვიუ მისცა, სადაც ფემინიზმზე ისაუბრა. ის ასევე შეეხო #MeToo მოძრაობას, რომელიც სექსუალური ძალადობისა და შევიწროების წინააღმდეგ ილაშქრებს.

ანდერსონმა თავის თავს ფემინისტი უწოდა, თუმცა დასძინა, რომ #MeToo კამპანია მომაბეზრებლად მიაჩნია:

"მე მგონია, რომ ფემინიზმმა ძალიან შორს შეტოპა. მეც ფემინისტი ვარ, მაგრამ, ჩემი აზრით, ეს ფემინიზმის ტალღა [#MeToo] მომაბეზრებელია. ის კაცებს პარალიზებას უკეთებს. #MeToo მოძრაობა ჩემთვის მეტისმეტია. ბოდიში, ამის თქმის გამო ალბათ მომკლავენ".

გადაცემაში 51 წლის ანდერსონს ჰარვი ვაინშტაინის სკანდალზე ჰკითხეს. 2017 წელს ჰოლივუდის ყოფილი პროდიუსერი უამრავმა ქალმა დაადანაშაულა სექსუალურ შევიწროებაში, ძალადობასა და გაუპატიურებაში. ვაინშტაინი შეუთანხმებელ სექსუალურ კონტაქტს უარყოფს.

ანდერსონმა ვაინშტაინის მიმართ არსებული ბრალდებების შეფასებისას, ის ქალები გააკრიტიკა, რომლებიც ძალადობრივ სიტუაციაში აღმოჩნდნენ:

"დედაჩემმა მასწავლა, რომ სასტუმროში უცხოს არ უნდა გავყვე. თუ საქმიან შეხვედრაზე ვინმე კარს გამიღებს და მხოლოდ ხალათში იქნება, მაშინ, იქნებ ჯობს, ვინმე გავიყოლო? ეს ხომ ელემენტარულია. და თუ შეხვალ, სამუშაოც მიიღე. მე კანადელი ვარ და იმას ვამბობ, რასაც ვფიქრობ, პოლიტიკურად კორექტული ვერ ვიქნები".

მსახიობი როზანა არკეტი ერთ-ერთი პირველია, რომელმაც ვაინშტაინი სექსუალურ შევიწროებასა და თავდასხმაში დაადანაშაულა და თქვა, რომ 90-იან წლებში, საქმიან შეხვედრაზე მისულს, ვაინშტაინი ხალათში დახვდა. მას ვაინშტაინისგან ფილმის სცენარი უნდა მიეღო, თუმცა მსახიობის თქმით, პროდიუსერმა მას მასაჟის გაკეთება სთხოვა და აიძულა მის პენისს შეხებოდა. უარის მიღების შემდეგ, არკეტის სიტყვებით, ვაინშტაინმა მას უთხრა, რომ დიდ შეცდომას უშვებდა. ინციდენტის შემდეგ, როზანა არკეტი კინომწარმოებლებისგან მიღებულ უარყოფას ვაინშტაინის გავლენებს უკავშირებს.