ტრადიციულად, iOS-ის ყველა განახლებას თან ახალი ემოჯიები ახლავს, გამონაკლისი არც ამ ოპერაციული სისტემის ბოლო განახალება, iOS 12.1 ყოფილა. მასში 158 ახალი ემოჯია, რომელთა შორის შეხვდებით სალათის ფურცელს, მაჩვს, მთვრალ კაცს, ადამიანის ფეხს და სხვებს.

ყველაზე დიდი ყურადღება 158-დან ერთმა, არც მეტი, არც ნაკლები, მთვრალმა ემოჯიმ დაიმსახურა.

ეს ის ემოჯია, რომელიც ღამის ორ საათზე ბართან მოგიჯდებათ, უკუღმა დალაგებული წინადადებებით თქვენს გაცნობას შეეცდება, შემდეგ კი თმაზე ლუდს გადაგასხამთ. სავარაუდოა, რომ მას ყველაზე ხშირად პარასკევსა და ვიქენდზე გამოიყენებთ, მისი საშუალებით, არაფხიზელ მდგომარეობაში გადამხდარი ისტორიების მეგობრებისთვის მოყოლა ერთიორად გაგიადვილდებათ.

ასევე განახლებულია ტელეფონის ემოჯიც, რომელსაც ახლა არა iPhone 6-ის, არამედ iPhone X-ის ფორმა აქვს. ახალი ემოჯიების პრეზენტაცია პირველად 17 ივლისს, ემოჯის მსოფლიო დღეზე მოხდა.

ფოტო: Emojipedia

"ემოჯიებს დედამიწის ყველა კუთხეში მცხოვრები ადამიანები იყენებენ. iOS 12.1-ში კი ჩვენ დავამატეთ ისეთი სიმბოლოები, რომლებიც ადამიანებს საკუთარი თავის გამოხატვაში დაეხმარებათ", - აცხადებენ Apple-ში.

ემოჯი უკვე დიდი ხანია მსოფლიოს ყველაზე სწრაფად მზარდ ენად არის დასახელებული. TalkTalk Mobile-ს მიერ ჩატარებული გამოკითხვისას, 18-დან 25 წლამდე ასაკის ახალგაზრდების 72-მა პროცენტმა განაცხადა, რომ მათ ემოციების გამოხატვა ემოჯის სიმბოლოებით უფრო უადვილდებათ, ვიდრე ტექსტით.

ყოველდღიურად ფეისბუქზე დაახლოებით 60 მილიონი ემოჯი ზიარდება. Emoji Tracker-ის მიხედვით, ამჟამად მსოფლიოში ყველაზე ნაკლებად გამოყენებული ემოჯი ლათინური ასოების სიმბოლოა, რომელიც რამდენიმე თვეა არავის გამოუყენებია, ხოლო ყველაზე ხშირად გამოყენებადი სიმბოლო კი გაცინებული ემოჯია, რომელსაც სიცილისგან ცრემლები მოსდის.