ჩვენ შევკრიბეთ ის მთავარი სამეცნიერო სიახლეები, რომლებიც შეიძლება დატვირთული კვირის განმავლობაში გამოგრჩენოდათ.

1. კვლევა: ყვავებს, იარაღების გამოყენების გარდა, მათი დამზადებაც შეუძლიათ

მაქს პლანკისა და ოქსფორდის უნივერსიტეტის მეცნიერების მიერ ჩატარებულ ექსპერიმენტში, ყვავებმა საკვების მოსაპოვებლად იარაღების დამზადება შეძლეს. ფრინველებმა გამოუსადეგარი ნივთების შეერთებით ერთი ფუნქციური ნივთი მიიღეს. ამ დრომდე მსგავსი ქცევა მხოლოდ ადამიანის მსგავს მაიმუნებში იყო შემჩნეული.

გაიგეთ მეტი: http://go.on.ge/vdc

2. ერთსაათიანმა პროცედურამ შესაძლოა დიაბეტის მქონე პაციენტებს ინსულინის ინექციებზე დამოკიდებულება მოუხსნას

მეცნიერებმა ახალი მეთოდით მე-2 ტიპის დიაბეტის მქონე პაციენტებში შაქრის დონის ხანგრძლივი დროით დარეგულირება შეძლეს. პროცედურისას პირის საშუალებით ნაწლავებამდე წვრილი მილის მიყვანა ხდება, რომელიც ნაწლავის შიდა მემბრანას აზიანებს, ამის შედეგად ნაწლავებში ახალი მემბრანების წარმოქმნა ხდება, რაც ორგანიზმის მერ გლუკოზის ათვისებას არეგულირებს.

წყარო: The Guardian

3. კვლევა: მიკროპლასტმასების პოვნა უკვე ჩვენს სხეულშიც შეიძლება

მეცნიერებმა ადამიანის განავლის ნიმუშები შეამოწმეს და მასში დიდი რაოდენობით პლასტმასის ნაწილაკები აღმოაჩინეს, თუმცა აღნიშნული შედეგის დასადასტურებლად უფრო ფართომასშტაბიანი კვლევების ჩატარებაა საჭირო.

გაიგეთ მეტი: http://go.on.ge/vay

4. მუცლადმყოფ ბავშვებს დიდ ბრიტანეთში ოპერაცია პირველად ჩაუტარეს

მუცლად მყოფ ბავშვებს სპინა ბიფიდა-ს ოპერაცია ჩაუტარდათ, რომელში მონაწილეობაც 30-მა ექიმმა მიიღო. სპინა ბიფიდა ხერხემლის თანდაყოლილი ანომალიაა, ამ დროს ზურგის ტვინი სწორად განვითარებას ვერ ახერხებს. ოპერაციამ წარმატებით ჩაიარა.

წყარო: ScienceAlert

5. აცრების რაოდენობის შემცირების გამო ევროპაში წელს 37 ადამიანი დაიღუპა

2018 წლის პირველ ექვს თვეში, ევროპაში წითელას 41 000 შემთხვევა დაფიქსირდა, რამაც 37 ადამიანის სიკვდილი გამოიწვია. მეცნიერების თქმით, ამის მიზეზი აცრების სიხშირის შემცირებაა. ეპიდემიის თავიდან ასარიდებლად, მოსახლეობის მინიმუმ 95 პროცენტი უნდა იყოს აცრილი, ამჟამად ეს მაჩვენებელი მხოლოდ 70 პროცენტია.

წყარო: ScienceAlert

6. კვლევა: ბნელი მატერია, შესაძლოა, უცნაურ, ცივ ვარსკვლავებს წარმოქმნიდეს

მეცნიერებმა ივარაუდეს, რომ პატარა გალაქტიკების გარშემო მიმოფანტულ გაზსა და მტვერში, ბნელი მატერია შესაძლოა, უცნაურ, ცივ ვარსკვლავებს ქმნიდეს. აღნიშნულ დასკვნამდე მეცნიერები სინათლის კვანტური გაზის სიმულაციის შექმნით მივიდნენ, რომელიც გრავიტაციულად ბნელი მატერიის ნაწილაკებთან ურთიერთქმედებს.

წყარო: ScienceAlert

7. მერკურის შემსწავლელი ხომალდი Bepicolombo წარმატებით გაეშვა

პროექტი Bepicolombo პირველი ევროპული მისიაა, რომელიც მერკურის შეისწავლის. მერკური მზის სისტემის ერთ-ერთი ყველაზე პატარა და ნაკლებად შესწავლილი პლანეტაა. ხომალდს მერკურიმდე მისასვლელად შვიდი წელიწადი დასჭირდება.

წყარო: European Space Agency

8. შავ ზღვაში მსოფლიოში ყველაზე ძველი ჩაძირული გემი აღმოაჩინეს

არქეოლოგებმა ბულგარეთის სანაპიროსთან ახლოს 2400 წლის წინ ჩაძირული გემი აღმოაჩინეს, რომელიც ხელუხლებელ მდგომარეობაშია შემონახული. 23-მეტრიანი ხომალდი, რომელსაც წყლის ზედაპირამდე 1.6 კმ აშორებს, სავარაუდოდ, ძველ ბერძნებს ეკუთვნოდათ.

გაიგეთ მეტი: http://go.on.ge/v7i

9. კოსმოსში ყოფნა თქვენი ტვინის სტრუქტურას ცვლის

მეცნიერებმა ათი ასტრონავტის ტვინი მაგნიტურ-რეზონანსული ტომოგრაფიის საშუალებით შეისწავლეს და აღმოაჩინეს, რომ კოსმოსში ყოფნის შემდეგ მათ ტვინში რუხი ნივთიერების რაოდენობა შემცირდა.

წყარო: Iflscience

10. აშშ-ში შობადობა იკლებს, მიზეზი დაუდგენელია

ანგარიში აშშ-ს დაავადებათა კონტროლისა და პრევენციის ცენტრმა გამოაქვეყნა. შობადობის კლების სავარაუდო მიზეზი შეიძლება სპერმის ხარისხის გაუარესება ან დეკრეტული შვებულებების არახელსაყრელი პირობები იყოს.

წყარო: Iflscience