რამდენიმე თვის წინ, ცნობილი გახდა, რომ მსახიობი სკარლეტ იოჰანსონი ახალ როლზე დაამტკიცეს. ფილმში სკარლეტ იოჰანსონს ტრანსგენდერის როლი უნდა შეესრულებინა, თუმცა როლზე დათანანხმების გამო, მსახიობი კრიტიკის ქარ-ცეცხლში გაეხვა.

სწორედ ამ კრიტიკის გამო, მსახიობმა საბოლოოდ როლზე უარი თქვა.

"ჩემი ახალი როლის ირგვლივ გაჩენილი კითხვების გამო, გადავწყვიტე უარი ვთქვა ფილმში მონაწილეობაზე. საბედნიეროდ, ჩვენი კულტურული გაგება ტრანსგენდერი ადამიანების მიმართ წინ მიიწევს და მეც ბევრი ახალი რამე გავიგე ამ ადამიანების შესახებ. ვხვდები, რომ ჩემი მხრიდან ამ როლზე დათანხმება გულუბრყვილო, თუმცა უგრძნობი გადაწყვეტილება იყო. მე პატივს ვცემ ტრანს-საზოგადოებას და ძალიან მიყვარს ისინი, სწორედ ამიტომ აბსოლუტურად მესმის იმ ადამიანების პოზიცია, რომლებიც თვლიან, რომ ეს როლი სწორედ ტრანსგენდერმა მსახიობმა უნდა ითამაშოს", - ამბობდა მაშინ მსახიობი.

იოჰანსონის მხრიდან, როლზე უარის თქმა გამოეხმაურა ორი ოსკარის მფლობელი ქეით ბლანშეტი და თქვა, რომ ჰეტეროსექსუალ მსახიობებს გეი პერსონაჟების თამაშის საშუალება არ უნდა შეეზღუდოთ.

"რა თქმა უნდა, ვეთანხმები იმას, რომ პირადი გამოცდილება ძალიან მნიშვნელოვანია, თუმცა, თუ კარგი მსახიობი ასრულებს როლს, მას შეუძლია ნებისმიერ პერსონაჟთან მოახერხოს კავშირის დამყარება", - ამბობს მსახიობი.

თავად ბლანშეტს რამდენიმე ფილმში აქვს შესრულებული ლესბოსელი პერსონაჟის როლი.