რამდენიმე წლის წინ მეცნიერებმა პოლონეთში ადამიანის განამარხებული ძვლები აღმოაჩინეს, თუმცა მხოლოდ ახლახან გახდა ცნობილი, რომ აღნიშნული ნამარხი ნეანდერტალელ ბავშვს ეკუთვნის, რომელიც გამყინვარების ეპოქაში გიგანტურმა ფრინველმა შეჭამა.

აღნიშნული ნამარხი ნეანდერტალელი ბავშვის თითის ფრაგმენტებისგან შედგება. ფრაგმენტებს უამრავი წვრილი ხვრელი აქვს, რისი საშუალებითაც მეცნიერებმა ნამარხზე ბევრი რამ შეიტყვეს.

"ანალიზი მიუთითებს, რომ ამ ძვლებმა რომელიღაც დიდი ფრინველის საჭმლის მომნელებელ სისტემაში გაიარა" - აცხადებს კრაკოვის ერთ-ერთი უნივერსიტეტის პროფესორი.

აღნიშნული ძვლები პოლონეთში ნაპოვნი ადამიანთა ნაშთებიდან უძველესია.

მეცნიერები ფიქრობენ, რომ ბავშვი დაახლოებით ექვსი წლის იყო, როდესაც მას თავს ფრინველი დაესხა. ისიც დასაშვებია, რომ ფრინველმა უკვე დაღუპული ბავშვი შეჭამა.

ერთი სანტიმეტრის სიგრძის ძვლები ცუდად არის შემონახული, რის გამოც მათზე დნმ-ის ანალიზის ჩატარება ვერ ხერხდება. თუმცა მეცნიერები ამბობენ, რომ ძვლები ნამდვილად ნეანდერტალელი ბავშვისაა.

"ჩვენ ძვლების წარმომავლობაზე ეჭვები არ გვაქვს. ისინი გამოქვაბულში ზედაპირიდან რამდენიმე მეტრის სიღრმეზე ვიპოვნეთ. ამ ფენაში ჩვენ ნეანდერტალელებისთვის დამახასიათებელი ქვის იარაღებიც აღმოვაჩინეთ." - აცხადებს პროფესორი.

ნეანდერტალელები თანამედროვე ადამიანის მონათესავე სახეობაა, რომელიც 300 000 წლის წინ ევროპაში გამოჩნდა და დაახლოებით 35 000 წლის წინ გადაშენდა.