საქართველოს სახალხო დამცველი აქციების დროს ქვეითთა სავალ ნაწილზე კარვებისა და სხვა ნაგებობების გაშლის აკრძალვას საკონსტიტუციო სასმართლოში ასაჩივრებს. ამის შესახებ მედიას ინფორმაცია სახალხო დამცველის მოადგილემ, გიორგი ბურჯანაძემ კარვების ფონზე მიწოდა.

"ბოლო პერიოდში ცალკეული საჩივრების შესწავლის შედეგად გამოიკვეთა ერთგვარი ტენდენცია, რომ აქციის მიმდინარეობისას კარვის ან სხვა დროებითი კონსტრუქციების განთავსება სამართალდამცავი ორგანოების მიერ იზღუდება. საქართველოს სახალხო დამცველი მიიჩნევს, რომ ქვეითთა სამოძრაო ტერიტორიაზე აქციების და მანიფესტაციების გამართვისას კარვის, გასაშლელი საწოლის, ბანერების და სხვა დროებითი კონსტრუქციების გამოყენების ამკრძალავი ნორმა საქართველოს კანონმდებლობაში არ მოიპოვება", — აღნიშნულია სახალხო დამცველის აპარატის მიერ გავრცელებულ პრესრელიზში.

ერთ-ერთი ბოლო შემთხვევა, როცა შინაგან საქმეთა სამინისტროს თანამშრომლებმა ქვეითთა სასიარულო მონაკვეთზე აქციის მონაწილეებს კარვების გაშლის საშუალება არ მისცეს ზაზა სარალიძისა და მალხაზ მაჩალიკაშვილის მხარდამჭერი აქცია იყო. სარალიძე ხორავას ქუჩაზე მოკლული შვილის მკვლელის დასჯას ითხოვს, მაჩალიკაშვილი კი იმ სპეცოპერაციაში მონაწილე იმ პირების დაკავებას, რომლის შედეგადაც მისი შვილი გარდაიცვალა.