წლის დასაწყისში პენტაგონმა ახალი პროექტი JEDI დააანონსა, რომლის კონტრაქტის მოსაპოვებლადაც კონკურენციას ერთმანეთს მსოფლიოს უდიდესი ტექნოლოგიური კომპანიები უწევდნენ.

პროექტი JEDI ათი მილიარდი დოლარის ღირებულების კონტრაქტია, რომლის ფარგლებშიც ერთმა კომერციულმა მომწოდებელმა პენტაგონისთვის ტექნოლოგიური პლატფორმა უნდა შექმნას, რომელიც მიზნად ისახავს სხვადასხვა შეიარაღების სისტემების კომპიუტერულ მხარდაჭერასა და კლასიფიცირებული ინფორმაციის შენახვას.

Oracle-ისა და IBM-ის მიერ გავრცელებული განცხადების თანახმად, პენტაგონის მიერ შემუშავებული კონტრაქტის პირობები ამაზონის სერვისებზე იყო მორგებული, რაც აღნიშნულ კომპანიას უპირატესობას ანიჭებდა.

Oracle-მა აშშ-ს მთავრობის ანგარიშვალდებულების სამსახურში აღნიშნული კონტრაქტი აგვისტოში გააპროტესტა, კომპანია აღნიშნავდა, რომ კონტრაქტის მხოლოდ ერთ კომპანიასთან გაფორმება არსებულ რეგულაციებსა და კანონს ეწინააღმდეგებოდა. მსგავსი შინაარსის განცხადება აშშ-ს ანგარიშვალდებულებების სამსახურში ტენდერის დასრულებამდე რამდენიმე დღით ადრე IBM-მაც შეიტანა.

IBM-ისა და Oracle-ის განცხადებებში ნახსენები ერთი კომპანია, რა თქმა უნდა, ამაზონია. კომპანიები არა მარტო ტენდერის უსამართლო პირობებს, არამედ იმასაც აპროტესტებენ, რომ პენტაგონი შეიარაღებული სისტემების კომპიუტერული მართვის ინფრასტრუქტურასა და კლასიფიცირებულ ინფორმაციაზე წვდომის "გასაღებს" მხოლოდ ერთი კომპანიის ხელში აგდებს.

გუგლი კონკურენციას ერთი კვირის წინ გამოეთიშა, მიზეზად კი ეთიკური პრობლემები და სერტიფიკატების არქონა დასახელდა.

ბრალდებები, რომ პენტაგონს პროექტის ჩამოყალიბებისას გათვლა ერთ კომპანიაზე ჰქონდა, საფუძველს მოკლებული არ არის.

კომპანიების დასმულ კითხვაზე, იყო თუ არა მორგებული პროექტის მკაცრი ვალდებულებები და მოთხოვნები ამაზონის სერვისებზე, პენტაგონმა პასუხი ვერ გასცა.

თუ ამაზონი აღნიშნულ კონტრაქტს გააფორმებს, პენტაგონის ერთ-ერთი ყველაზე ამბიციური ქლაუდ პროექტი მის განკარგულებაში ათი წლის განმავლობაში იქნება.