ლეგენდარული მსახიობი მერილ სტრიპი და გარი ოლდმანი სტივენ სოდერბერგის ახალ ფილმში, The Laundromat, მთვარ როლებს შეასრულებენ. კინოსურათს ნეტფლიქსი გადაიღებს.

სამსახიობო ანსამბლში ასევე ვიხილავთ ანტონიო ბანდერასსა და დევიდ შვიმერს.

ფილმის სიუჟეტი პანამის დოკუმენტებს ეხება.

2016 წლის 9 აპრილს, ვაშინგტონის დროით 14:00-ზე, ჟურნალისტებისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ოფშორულ ზონებს ფულის გასათეთრებლად და გადასახადებისგან თავის ასარიდებლად.

გამოჟონილი დოკუმენტების რაოდენობა კოლოსალურია. იურიდიული ფირმის შიდა ბაზიდან 2.6 ტერაბაიტის მოცულობის 11.5 მილიონი დოკუმენტია ამოღებული, რაც ბევრად მეტია, ვიდრე 2010 წლის ვიკილიქსის ან 2013 წლის სნოუდენის დოკუმენტები.

პანამის დოკუმენტები უპრეცედენტო ჟურნალისტური გამოძიებაა. გამომძიებელ ჟურნალისტთა საერთაშორისო კონსორციუმი (ICIJ) გერმანულ გაზეთ Suddeutsche Zeitung-თან, OCCRP–სა და სხვა 100-ზე მეტ მედია-პარტნიორთან ერთად, ერთი წლის განმავლობაში ამუშავებდა დოკუმენტებს, რათა გამოეაშკარავებინა მსოფლიოს პოლიტიკურ ლიდერთა კავშირები ოფშორულ ჰოლდინგებთან, გლობალურ სკანდალებთან, მათი ფარული ფინანსური ოპერაციები თაღლითებთან, ნარკომოვაჭრეებთან, მილიარდელებთან და ვარსკვლავ სპორტსმენებთანაც კი.

უფრო ვრცლად პანამის დოკუმენტებზე წაიკითხეთ: პანამის დოკუმენტები — მოკლედ და გასაგებად.