"ლიბანსა და ჰანოვერს არაფერი აქვთ საერთო ერთმანეთთან, მაგრამ თუ ამ ადგილებს შორის რაიმე ტიპის კავშირს წარმოვიდგენთ, ეს სივრცე უმშვენიერესია", - ასე აღწერენ დარქვეივ ჯგუფის, Lebanon Hanover-ის წევრები საკუთარ მუსიკას.

80-იანების ესთეტიკითა და დაბალი ხავედროვანი ვოკალით სავსე სიმღერები თანამედროვე უგრძნობ სამყაროსთან დისონანსს ქმნის. ჯგუფისთვის სევდა გულგრილობის წინააღმდეგ ამბოხებაა (Sadness is Rebellion), რომანტიკა კი ბანალურობისგან სრულიად დაცლილია.

20 ოქტომბერს, 20:00 საათზე დუეტი დარბაზ SPACEHALL-ის სტუმრების წინაშე ცოცხალი პერფორმანსით წარდგება, რითაც პროექტი მუზამე შთამბეჭდავად დაბრუნდება.

ექსპერიმენტული მუსიკალური პროექტი Muzame მარტში 2 წლის გახდა. გასული წლის განმავლობაში მუზამეს ფარგლებში თბილისს ისეთი არტისტები ეწვივნენ, როგორებიც არიან XIU XIU, THE IRREPRESSIBLES, JAY-JAY JOHANSON, PSYCHIC TV, MOLLY NILSSON და ა.შ

Libanon Hanover მუზამეს კონცეფციაში ბუნებრივად ეწერება - ეს ჯგუფიც, პროექტის ფარგლებში ჩამოყვანილი სხვა შემსრულებლების მსგავსად, განსაკუთრებულ მუსიკას ქმნის, რომელიც პოპულარულობის მიუხედავად, სრულიად განყენებულია თანამედროვე გლამურული ცნობადობისგან.

"Lebanon Hanover-ის მუსიკა ცივ სამყაროზე რეაქციაა, რომელიც ორი თბილი მფეთქავი გულიდან მოდის" - ნათქვამია ჯგუფის გვერდზე. თუ ბრიტანულ-გერმანული დუეტი ამ ენერგიის გადმოცემას ცოცხლადაც შეძლებს, მსმენელს მუზამეს არსებობის ისტორიაში საუკეთესო საღამო ელოდება.

ბილეთების შეძენა აქ შეგიძლიათ.