ტელეკომპანია იბერიას საინფორმაციო სამსახურის უფროსის, ვახო ხუზმიაშვილის ცნობით, ომეგა ჯგუფის ერთ-ერთი თანამშრომელი, დავით თოლორდავა 2015 წლის საქმესთან დაკავშირებით პოლიციაში დაიბარეს. მისივე ცნობით, თოლორდავა იბერია-ომეგას საქმეში ლევან ყიფიანის ეპიზოდში ფიგურირებს. მათი პოზიციით, ეს ქმედება იბერია-ომეგას თანამშრომლების მიმართ ხელისუფლების მხრიდან რეპრესიების დაწყებას უკავშირდება.

ვახო ხუზმიაშვილმა იბერიასა და ომეგას თანამშრომლების უსაფრთხოებაზე პასუხისმგებლობა სახელმწიფოს დააკისრა და არასამთავრობო და საერთაშორისო ორგანიზაციებს დასახმარებლად მიმართა.

შინაგან საქმეთა სამინისტროს ცნობით, თოლორდავას საქმეზე გამოძიება 2015 წელს, თვითმკვლელობამდე მიყვანის მუხლით დაიწყო და დასკვნით ეტაპზეა მისული.

"ვინაიდან საქმეში არ არის სასამართლო სამედიცინო ექსპერტიზის დასკვნა და ექსპერტს საბოლოო დასკვნისთვის სჭირდებოდა დამატებითი სამედიცინო გამოკვლევის დოკუმენტაცია, ამიტომ დავიბარეთ დავით თოლორდავა", - განაცხადეს უწყებაში.

მათივე ცნობით, დავით თოლორდავამ შინაგან საქმეთა სამინისტრო უკვე დატოვა.