ერექციის დისფუნქციისთვის მიღებულმა წამლის გადაჭარბებულმა დოზამ მამაკაცის ცხოვრება სრულად შეცვალა. ექიმები აცხადებენ, რომ მას მხედველობა სამუდამოდ დაუზიანდა, ის ახლა ყველაფერს წითელ ფერებში ხედავს.

სილდენაფილი ერექციის დისფუნქციისთვის ხშირად გამოიყენება, მისი ბრენდული სახელწოდება ვიაგრაა. მედიკამენტი საკმაოდ უსაფრთხოა, თუმცა სტანდარტული დოზით დანიშვნის დროსაც კი, ის ზოგჯერ გარკვეულ გვერდით ეფექტებს იწვევს - მხედველობის გაორება, ფერების აღქმის დარღვევა და სხვა. თუმცა, როგორც წესი, ეს სიმპტომები ერთ დღეზე მეტ ხანს არ გრძელდება.

თუმცა 31 წლის კაცს, რომლის შემთხვევაც დეტალურად ერთ-ერთ ჟურნალში გამოქვეყნდა, არ გაუმართლა.

არსებული ინფორმაციის თანახმად მან ინტერნეტიდან გამოწერილი თხევადი სილდენაფილი დალია, რის შემდეგაც მისი პრობლემები მალევე დაიწყო. წამლის მიღების შემდეგ მან მხედველობის არეში სხვადასხვა ფერის ნათებები შენიშნა, მისი თვალები სინათლის მიმართ ზედმეტად მგრძნობიარე გახდა, ხოლო მისმა მხედველობამ კი ნელ-ნელა წითელი ელფერი მიიღო.

ვინაიდან და რადგანაც მან თხევადი სილდენაფილის ბოთლი პირდაპირ მოიყუდა, მისი მიღებული დოზა უცნობია, თუმცა ცხადია, რომ მან წამლის გადაჭარბებული რაოდენობა მიიღო.

"ადამიანები ხშირად მიიჩნევენ, რომ თუ რაიმე მცირე ზომით სასარგებლოა, ის დიდი დოზით უფრო სასარგებლო უნდა იყოს, რაც სიცრუეა. ამ შემთხვევაში ჩანს, თუ რამდენად სახიფათო შეიძლება იყოს ეს ყველაფერი. ადამიანები, რომლებიც ფერად მხედველობაზე ძლიერად არიან დამოკიდებულნი ამ წამლის მოხმარებისას ფრთხილად უნდა იყვნენ," - აცხადებს ჟურნალის დირექტორი.

არსებობს ადამიანებსა და ცხოველებში ჩატარებული კვლევები, რომლებიც მიუთითებს, რომ სილდენაფილის გადაჭარბებულმა დოზამ შეიძლება მხედველობის სამუდამო დაზიანება გამოიწვიოს.

"ჩვენ დავადგინეთ, რომ მამაკაცს თვალის ბადურაზე არსებული კოლბები დაუზიანდა, ეს ის უჯრედებია, რომლებიც ფერების აღქმაში თამაშობს როლს. ეს პირველი შემთხვევაა, როდესაც სილდენაფილის მიერ გამოწვეული სტრუქტურული დაზიანებები ცხადად აღმოვაჩინეთ. ეს დაგვეხმარება, რათა ამ მედიკამენტის უფრო უსაფრთხო გამოყენების მეთოდები შევიმუშაოთ," - აცხადებს კვლევის ავტორი.

ვინაიდან მოცემული წამალი მამაკაცმა ინტერნეტში შეიძინა, ასევე დასაშვებია, რომ ის სუფთა სილდენაფილის ნაცვლად, სხვა ნივთიერებით დაბინძურებული პროდუქტი იყო.

სილდენაფილის გადაჭარბებით გამოყენების სხვა გვერდითი ეფექტები გულის ინფარქტი და ზედმეტად ხანგრძლივი ერექციაა, რაც შესაძლებელია პენისის ამპუტაციითაც დასრულდეს.