მაიკ მორჰაიმი, რომელმაც 1991 წელს თამაშების მწარმოებელი გიგანტი Blizzard Entertainment დააარსა თანამდებობიდან გადადგა.

კომპანიამ მისი ხელმძღვანელობის დროს რამდენიმე ძალიან წარმატებული თამაში - World of Warcraft, Diablo და Starcraft გამოუშვა.

კომპანიის აღმასრულებელი დირექტორი პოზიციას ალენ ბრეკი დაიკავებს, რომელიც ამ დრომდე World of Warcraft-ის აღმასრულებელი პროდიუსერისა და ვიცე-პრეზიდენტის პოზიციას იკავებდა, მაიკ მორჰაიმი კი მრჩეველის პოზიციაზე გადავა.

გამოსამშვიდობებელ განცხადებაში წასვლის მიზეზი ნახსენები არ არის.

"ინდუსტრიაში არსებულ ერთ-ერთ ყველაზე წარმატებულ და ნიჭიერ გუნდთან მრავალი წარმატებული და ყველასთვის საყვარელი პროდუქტის შექმნის შემდეგ დროა, რომ კომპანიის მმართველობა სხვა ადამიანს გადავაბარო," - ნათქვამია განცხადებაში.

Activision Blizzard-ის შვილობილი კომპანია, Blizzard Entertainment თამაშების სფეროში ერთ-ერთი ყველაზე მნიშვნელოვანი კომპანიაა. მათი შექმნილია მსოფლიოში ერთ-ერთი ყველაზე პოპულარული თამაში World of Warcraft. ეს ფანტასტიკის ჟანრის ქსელური თამაშია, რომელმაც გამოშვების შემდეგ საკუთარ ჟანრში რევოლუცია მოახდინა. გარკვეულ ეტაპზე თამაშს 12 მილიონი ადამიანი თამაშობდა, დღეს ეს რიცხვი დაახლოებით 4-5 მილიონია.

კომპანიის ახალმა ხელმძღვანელმა განაცხადა, რომ უახლოეს მომავალში მათგან ახალ თამაშებსაც უნდა ველოდოთ. მისი თქმით კომპანიას რამდენიმე სიურპრიზი აქვს, რომლის შესახებაც კომპანიის ყოველწლიურ შეკრებაზე, Blizzcon-ზე ნოემბერში გავიგებთ.