ბითლზის White Album-ის გამოსვლიდან პირველ ოქტომბერს 50 წელი გავიდა. ამ მოვლენასთან დაკავშირებით, პოლ მაკარტნიმ ამერიკულ სატელევიზიო გადაცემა 60 Minutes-ს ვრცელი ინტერვიუ მისცა.

მან ბევრ თემაზე ისაუბრა. მათ შორის იმაზე, რატომ ავიწყდება თავისი სიმღერის ტექსტები, რატომ არ წერს მუსიკას ნოტების ფურცელზე და ჯონ ლენონთან ურთიერთობაც გაიხსენა.

"ჩვენ ერთმანეთს ვეჯიბრებოდით. ღიად არა, მაგრამ მოგვიანებით ამას ვაღიარებდით: 'პოლმა რაღაც კარგი დაწერა და მგონი დროა, მეც მივხედო საქმეს', ან ჩემ შემთხვევაში 'რა კარგი რამ დაუწერია ჯონს. ახლა ჩემი ჯერია'. თუ ჯონი დაწერდა Strawberry Fields-ს, მე Penny Lane-ით ვეწეოდი", - ყვება მაკარტნი მასსა და ლენონს შორის არსებულ მეგობრულ კონკურენციაზე.

პოლის სიტყვებით, ჯონმა ის მხოლოდ ერთხელ შეაქო:

"ეს მაშინ მოხდა, როცა ალბომზე Revolver ვმუშაობდით და ეს სიმღერა იყო Here, There and Everywhere. როცა მოსმენა დაასრულა, ჯონმა მითხრა: 'ეს მართლა ძალიან კარგი სიმღერაა, ბიჭუნა', და მივხვდი რომ მართლა ძალიან მოეწონა და ჩემთვის ეს ბევრს ნიშნავდა. იმდენად, რომ დღემდე დამამახსოვრდა".

მაკარტნის თქმით, მან პასუხად ასევე კომპლიმენტი დაუბრუნა და დასძინა, რომ ასეთ დროს ალკოჰოლი ეხმარებოდა.