ყველაზე პოპულარული ჩინელი მსახიობი ფან ბინბინი უკვე 4 თანი გაუჩინარების შემდეგ პირველად გამოჩნდა.

მსახიობის გაუჩინარების შემდეგ, მედია წერდა, რომ ის ჩინეთში დიქტატორულ რეჟიმს გაექცა, ახლა ლოს-ანჯელესშია და აშშ-ს თავშესაფარს სთხოვს.

თუმცა, როგორც აღმოჩნდა, ჩინეთის ყველაზე დიდი ვარსკვლავის გაუჩინარებაში მთავრობის ხელი ერია, მსახიობს გადასახადების დამალვაში ადანაშაულებენ და ჯარიმის სახით $129 მილიონის გადახდას სთხოვენ.

მსახიობმა გაუჩინარების შემდეგ პირველი კომენტარი გააკეთა და კომუნისტურ პარტიასთან ერთად ბოდიში თავის ფანებსაც მოუხადა.

"მე დავაღალატე ჩემი ქვეყანა, საზოგადოება და ფანები. არაფერი ვიქნებოდი სახელისუფლებო პარტიისა და იმ ხალხის გარეშე, ვინც ჩემს გარშემო ცხოვრობს და სიყვარულით მავსებს. გადასახადებს აუცილებლად გადავიხდი და ბოდიშს ვიხდი იმ ყველაფრისთვის, რაც ჩემს გარშემო ხდება", - თქვა მსახიობმა.

მიუხედავად ამ კომენტარისა, მსახიობის ადგილმდებარეობა უცნობია. გარდა ამისა, დაპატიმრებულია მისი აგენტი.

ბინბინის მისამართით კრიტიკა ჯერ კიდევ გასულ წელს დაიწყო, როდესაც ხელისუფლებასთან ერთად მსახიობს ჩინური მედიის ნაწილიც აკრიტიკებდა და მას ახალგაზრდებისთვის არამისაბაძ მაგალითს უწოდებდა.

ამის მაგალითი იყო მთავრობის მიერ დაფინანსებული ბოლო გამოკითხვაც, რომელშიც ფანმა 0 პროცენტი მიიღო და სოციალური ყველაზე უპასუხისმგებლოს სტატუსი მიანიჭეს.

ფანის მიმართ კრიტიკა ჯერ კიდევ მაშინ გაისმა, როდესაც ის ფორბსმა ერთ-ერთ ყველაზე მაღალანაზღაურებად მსახიობად დაასახელა, მაშინ ხელისუფლება და მედია აქტიურად მოუწოდებდა მსახიობს, რომ ხელი არ შეეწყო ფულის გაღმერთებისთვის და არ მოეხდინა "დამახინჯებულ სოციალურ ღირებულებების" პოპულარუზაცია.

ამის შემდეგ, ბინბინსა და სხვა მსახიობებს, ხელისუფლებამ ჰონორარის მისაღებად გარკვეული ზღვარი დაუწესა.

ჩინეთის გარდა, ბინბინი დიდი პოპულარობით სარგებლობს ჰოლივუდშიც. მას მონაწილეობა უნდა მიეღო ახალ ჯაშუშურ ტრილერში 355, სადაც პარტნიორობას ჯესიკა ჩესტეინს, პენელოპე კრუზს, ლუპიტა ნიონგოს და მარიონ კოტიარს გაუწევდა, თუმცა ამ ეტაპზე უცნობია ითამაშებს თუ არა ისევ ჩინელი მსახიობი ფილმში.