აფრიკული სავანის სპილოების ჩახლართული ნაოჭების ქსელის შესწავლისას დადგინდა, რომ ნაოჭები სპილოებს ტემპერატურის რეგულირებასა და პარაზიტებისაგან თავის დაცვაში ეხმარება.

სპილოს დანაოჭებულ, უსწორმასწორო კანს მინიმუმ ხუთჯერ მეტი წყლის შეკავება შეუძლია, ვიდრე სწორ ზედაპირს.

ფოტო: UNIGE Michel C. Milinkovitch

კვლევაში ჟენევის უნივერსიტეტისა და შვეიცარიის ბიოინფორმატიკის ინსტიტუტის მეცნიერები მონაწილეობდნენ.

"სპილოებისთვის, დიდი ზომისა და მათი თბილი და მშრალი საცხოვრებელი გარემოს გამო, გაგრილების უმთავრესი გზა კანზე დაგროვილი წყლის აორთქლებაა," - აცხადებს კვლევის ავტორი.

მეცნიერებმა აღმოაჩინეს, რომ სპილოების კანზე არსებული ნაოჭები არა მხოლოდ უბრალო ნაკეცები, არამედ კანის ზედა ფენაში არსებული პატარა ბზარებია - სპილოების კანი პაწაწინა წანაზარდებს იკეთებს, რომელიც მოძრაობისას ტყდება, ამის შედეგად კი კანზე ბზარები წარმოიქმნება.

აფრიკულ სპილოებს წყალში ჩასვლა და ტალახში გორიალი ძალიან უყვართ. სპილოებს საოფლე და კანის საპოხი ჯირკვლები არ გააჩნიათ, ამიტომ ტემპერატურის რეგულირებისთვის ისინი საკუთარ კანზე არსებულ პაწაწინა ბზარებსა და ნაოჭებში შენახულ წყალს იყენებენ. ნაოჭები სპილოებს მზის რადიაციისა და სხვადასხვა პარაზიტისგანაც იცავს.

ფოტო: UNIGE Michel C. Milinkovitch