სამეფო კარის თამაშების პერსონაჟი, სერსეი ლანისტერი, რომლის როლსაც ლინა ჰიდი შეუდარებლად ასრულებს, ტელევიზიის ისტორიაში უდაოდ ერთ-ერთი ყველაზე საკამათო პერსონაჟია.

მაყურებლის ნაწილს ის სძულს, მეორე ნაწილი - გიჟდება მასზე, კიდევ ერთ ნაწილს კი ხან სძულს, ხან უყვარს, ხანაც ეცოდება.

ერთი შეხედვით მას შესაცოდი თითქოს არაფერი აქვს - გულქვა, ბოროტი და დაუნდობელი ქალია, რომელიც ყველას, ვინც რკინის ტახტიდან ჩამოგდებას უპირებს, ანადგურებს.

მეორე ნაწილის აზრით, ის გარემოებების მსხვერპლია, რომელიც ძალადობამ, უგუვებელყოფამ და სხვების გულგრილობამ საბოლოოდ ასეთ მონსტრად აქცია.

როგორც აღმოჩნდა, ჯორჯ მარტინს სწორედ ასეთი პერსონაჟის შექმნა სურდა, მეტიც, სერსეი ლანისტერს ის ტელევიზიის ისტორიაში ერთ-ერთ ყველაზე განსაცვიფრებელ პერსონაჟს უწოდებს, რომელმაც მოახერხა და ბევრი სისასტიკის მიუხედავად მაყურებელს თავი შეაყვარა.

რა გახდა ამის მიზეზი? თუ მარტინს დავუჯერებთ, მან ამ პერსონაჟში გააერთიანა ორი ყველაზე დიდი გრძნობა - სიყვარული და სიძულვილი. ერთის მხრივ მას შეუძლია გაანადგუროს ყველაფერი, მეორეს მხრივ კი შეუძლია ბოლომდე იბრძოლოს იმისთვის ვინც უყვარს.

როგორც მარტინი ამბობს, სერსეი მართალია ღიად არ გამოხატავს სიყვარულს, მაგრამ მისი მთავარი მინიშნებებიც სწორედ დეტალებში იმალება.