6 წლის მეისონ მოტსი სტომატოლოგთან გეგმიურ შეხვედრაზე მივიდა, თუმცა ერთმა ვიზიტმა მისი ცხოვრება მთლიანად შეცვალა.

მეისონი ექვს წლამდე არ საუბრობდა და ამ პერიოდის განმავლობაში გარშემომყოფებთან არავერბალურად კონტაქტობდა. როგორც ექიმები მის მშობლებს ეუბნებოდნენ, ბიჭუნა ვერასდროს ისაუბრებდა, რადგან ახალშობილს ტვინზე ანევრიზმა ჰქონდა.

მას ასევე სოტოსის სინდრომი აქვს — გენეტიკური დარღვევა, რომელიც სახის სტრუქტურის განვითარებაზე ახდენს გავლენას და დასწავლისას სირთულეებს ქმნის.

მეისონთან სპეციალისტები მუშაობდნენ, რომ მისი ლაპარაკის შესაძლებლობა გაუმჯობესებულიყო, თუმცა პროგრესს ვერ აღწევდნენ.

"მისი სალაპარაკო ლექსიკონი 5 სიტყვისგან შედგებოდა, ჩვენ კი მკურნალობის ალტერნატიულ გზებს ვეძებდით. ის წინადადების მხოლოდ პირველ სიტყვას ამბობდა და მისი მხოლოდ მე და ჩემს ქმარს გვესმოდა", - ამბობს მეისონის დედა მერედიტი.

როგორც სტომატოლოგთან ვიზიტის შემდეგ გაირკვა, მეისონს ენის ლაგამი ჰქონდა, რაც ენის პირის ძირზე დაბმას გულისხმობს. მშობლები სამედიცინო ჩარევას დათანხმდნენ, რაც დაახლოებით 10-წამიან პროცედურას გულისხმობდა.

იმავე დღეს მეისონმა ლაპარაკი დაიწყო.

"საღამოს სახლში დავბრუნდით თუ არა, მან ჩვენთან ლაპარაკი დაიწყო. 'შეიძლება ფილმი ჩავრთო? მშია, მწყურია', ამ ყველაფერს პროცედურიდან რამდენიმე საათში გვეუბნებოდა და ჩვენ გაოცებულები ვუყურებდით, რადგან ის პირველად გველაპარაკებოდა და პირველად ასრულებდა წინადადებებს. შოკში ვიყავით", - იხსენებს ჯეისონის დედა.

მეისონი საუბრის გასაუმჯობესებლად სპეციალისტთან კვლავ დადის. პროცედურიდან რამდენიმე თვეში მან 1-დან 4 წლამდე ბავშვის საუბრის დონეზე მიაღწია. როგორც სპეციალისტები ამბობენ, მეისონი თანატოლივით საუბარს 13 წლის ასაკში დაიწყებს. პროცედურის შემდეგ მეისონის ცხოვრება ბევრად გაუმჯობესდა. ის ვერბალურ კონტაქტს ამყარებს ადამიანებთან და ამის გარდა, კვების დროს აღარ ახველებს.

როგორც მეისონის დედა ამბობს, ყველა მშობელმა უნდა იბრძოლოს საკუთარი შვილის კეთილდღეობისთვის.