ევროპული საქართველოს წევრებს სოფელ დაშტაფაში ორი წლის განმავლობაში ეგონათ, რომ ნაციონალური მოძრაობა და ევროპული საქართველო ერთი და იგივე პარტია იყო. ამის შესახებ ინფორმაცია თავდაპირველად ადგილობრივმა მედიამ, რადიო მარნეულმა გაავრცელა.

გამოცემის ცნობით, ერთიანი ნაციონალური მოძრაობის ოფისში გამართულ ბრიფინზე პარტიის წევრებმა განაცხადეს, რომ ევროპული საქართველო დატოვეს და ნაციონალურ მოძრაობაში გადავიდნენ.

მათი თქმით, ევროპულ საქართველოში ატყუებდნენ, ამიტომ ფიქრობდნენ, რომ ევროპული საქართველო და ნაციონალური მოძრაობა ერთი და იგივე პარტიაა.

ამავეს ფიქრობდა ევროპული საქართველოდან 2017 წლის ადგილობრივი თვითმმართველობის არჩევნებზე პროპორციული სიით მე-12 კანდიდატად დარეგისტრირებული გულიევ ნიზამიმიც.

ნაციონალური მოძრაობის პრესსამსახურის განმარტებით, პირებმა, რომლებიც მათ რიგებს შეუერთდნენ იცოდნენ, რომ ევროპული საქართველოს წევრები იყვნენ, თუმცა სჯეროდათ, რომ ორივე პარტია ერთ საქმეს აკეთებდა და მიხეილ სააკაშვილის მხარდაჭერილი იყო.

"მას შემდეგ, რაც მიხეილ სააკაშვილმა გააკეთა განცხადება, რომ ევროპული საქართველოს პრეზიდენტობის კანდიდატი, დავით ბაქრაძე არ წარმოადგენს ნაციონალურ მოძრაობას, ეს ადამიანები მიხვდნენ, რომ ევროპული საქართველო და ნაციონალური მოძრაობა სხვადასხვა პარტიაა", — უთხრეს On.ge-ს ნაციონალურ მოძრაობაში.

კითხვაზე, რატომ არ მიაწოდებს, მათ სრულყოფილი ინფორმაცია ნაციონალური მოძრაობის დაშლის დროს, On.ge-ს უთხრეს, რომ ეს ადგილობრივი ხელმძღვანელობს პასუხისმგებლობაა.

"ადგილობრივი ხელმძღვანელობა არწმუნებდა, როგორც ჩანს", — აცხადებენ პარტიაში.

ევროპული საქართველოდან წევრების წასვლის მიზეზებზე პარტიის მარნეული ოფისის თავმჯდომარე, ახმედ იმამ კულიევი ამბობს, რომ ისინი ისე იქცევიან, როგორც საბავშვო ბაღში. ახმედ იმამ კულიევის კომენტარს ადგილობრივი ტელევიზია მარნეული TV ავრცელებს.

"ამაზე ჩემთვის კომენტარის გაკეთება სირცხვილია. ყველა ვინც გადავიდა ერთი დღე კი არა რამოდენიმე თვის წინ გადავიდნენ. გააკეთეს იგივე ჩანაწერი და ახლა, ვითომ ყოველდღიურად გადადიან ევროპული საქართველოდან", — განაცხადა ახმედ იმამ კულიევმა.